Бекіре берік бақылауда болмақ

«Бекіре-2015» акциясы басталғалы, 1 сәуірден бері қарай 226 табиғат қорғау заңнамасының бұзылғандығы анықталса, оның ішінде балықты заңсыз аулаудың – 198, балықты заңсыз тасымалдаудың 20 фактісі тіркелген. Аталған заң бұзушылық бойынша әкімшілік жауапкершілікке 171 адам тартылған. Сондай-ақ, 28 қылмыстық іс қозғалып, 51 материал сот органдарына жолданды. Бұл жөнінде Президент жа­нындағы Орталық коммуникациялар қызметінде өткен брифингте Ауыл шаруашылығы ви­це-министрі Ерлан Нысанбаев мәлімдеді. Оның айтуынша, балық қорғау инспекторла­ры браконьерлерден 27 тонна балық, оның ішінде, 1 тонна бекіре балығы, шамамен 18 ки­ло уылдырық, 1200 балық аулау мен 176 жүзу құралдарын тәркі­леген. Жалпы, мемлекет бойынша балық қорғау инспекторлары 2014 жылы әкімшілік құқық бұзу­шылық туралы 6764 хаттама тол­тырып, 979 құқық бұзушы әкім­шілік жауапкершілікке тартылды, 50 адам сотпен қылмыстық жау­апкершілікке жазаланды, деді Е.Нысанбаев. Сонымен қатар, бекіре ба­лы­ғын заңсыз аулағаны үшін 2000 ең төменгі есептік көрсеткіш көлемінде айыппұл немесе 2 жылға дейін бас бостандығынан айыру қарастырылып отырғанын атап өтті. Және де осындай заң бұзушылық аясында табиғатқа көлемді залал келтірілген жағ­дай­да, сондай-ақ балық аулау ұйым­дасқан түрде іске асса, ол кезде 2 жылдан 5 жылға дейін бас бос­тандығынан айыру жазасы қолда­нылатын болады, деді вице-министр. Республикада 35-ке жуық ба­лық өсіру кәсіпорындары бар. Агроөнеркәсіптік кешен­ді дамытуға арналған «Агро­биз­нес-2020» бағдарламасында тауарлық балық өсіруді дамыту үшін мемлекеттік қолдау шаралары қарастырылған, дей келе вице-министр Каспий теңізінің биологиялық ресурстарын, әсіресе, бекіре тұқымдас балық түрлерін сақтауға зор мән беріліп отырғандығын көлденең тартты. Осыған байланысты 2010 жылы Каспий теңізімен шекаралас мемлекеттердің үшінші Саммиті өткеннен кейін Елбасы Нұрсұлтан Назарбаев Каспий теңізінің су биологиялық ресурс­тарын ұтымды пайдалану және сақтау келісімін талқылауды жал­ғастыруды, сондай-ақ 5 жыл мерзімге дейін Каспийде бекіре балығын коммерциялық аулауға мораторий енгізу механизмін әзірлеуді тапсырған болатын, деді. Осының аясында өткен жылдың қыркүйек айында Астрахань қаласында бұл келісімге Каспий теңізімен шекаралас 5 мемлекет қол қойды. Балық шаруашылығын одан әрі дамыту, қолданыстағы нормативтік-құықтық базаны жетілдіру мақсатында, Үкіметтің 2015 жылғы заң жобалары жос­парына сәйкес министрлік Қа­зақстан Республикасының кей­бір заңнамалық актілеріне өсім­діктер мен жануарлар дүниесі мәселелері бойынша өзгерістер мен толықтырулар енгізу туралы заң жобасын әзірледі. Құжат Каспий теңізінің су биологиялық ресурстарын ұтымды пайдалану және сақтау мәселесін, сондай-ақ, ортақ биологиялық ресурстарды басқаруды реттейді. Қазіргі таңда еліміздің Ауыл шаруашылығы министрлігі келісімнің күшіне енуіне қажетті рәсімдер әзірлеуде, деді Е.Нысанбаев. Эльмира МӘТІБАЕВА, «Егемен Қазақстан».