Алатау. Ақша бұлт. Аппақ қар

Аппақ  қарға оранған алып таудың  керім келбеті жанар қарықтырып көз жауыңызды алады. Аспандағы ақша бұлт қана тау мен даланың аппақ кейпіне ерекше назар салғанын аңғарғандай боласыз. Ақпан айындағы шырайлы көрініске қарап іштей сұлу кейіпке таңданысыңызды жасыра алмайсыз. Іле Алатауының мәңгі қар мен мұздықтары шақырайған нұрлы күннің сәуле шашқан ғажайып сұлу көрінісі  мерейіңізді өсіре түседі. Іле Алатауының өзендер өрнектеген әдемі кейпіне көз тоқтатқан сайын Ұзынқарғалы, Шамал­ған, Қаскелең, Ақсай, Қарғалы, Үлкен Алматы, Кіші Алматы, Талғар, Есік, Шелек арналары бұралаң-бұралаң күйінде Балқашқа қарай атырауланып асығады. Мың сан өзен алқаптарында күні ертең дүр көтерілер гүлдер мен өсімдіктер бүр жаратынына аңсарыңыз ауады. Алатау маңғаздана түскендей, тұңғиық көк аспанға ілінген ақша бұлт қарлы өңірге миығынан қарайтындай, сол сәт көктемнің де жақын қалғанын сездіргендей шатқал-шатқалдың арасынан алтынкүрек  желі лекіп бір өтеді. Сол кездері көктемнің күлімдей келгеніне қуанған күйі беткей-беткейде бәй­­ше­шек, қызғалдақ, таушымылдық, бөрі қарақат пен сап-сары түске оранып қаз жуасы көмкеріледі, бой түзеп қызғалдақ пен сарғалдақ көтеріледі. Көгілдір аспаннан нұр себезгілеп мұзарт шыңдардың әдемі келбеті келер көктемнің уыз бейнесінің иісі тынысыңды қытықтағандай манауратады, аппақ қарлы беткейге өзімсіне енген ақша бұлт таулы өңірге еркелеп келгендей сырлы  мінез көрсетеді. Шырша басында қонақтаған бір уыс ұлпа қар алтынкүрек желдің деміне шыдас бере алмастай екен. Мұзарт шыңдары жанар  арбай түскен Алатау көз тоймас әсемдігімен тәнті етеді, ғажап көрінісіне көз қиығын ғана тастап толқыған ынтызар көңілін жасыра алмай, ақша бұлт өзімен өзі масаттанады... Кіршіксіз, айқай, перизат Алатау пәк көңілін жасыра алмай шадыман болғысы келеді, соны түсінгендей ақша бұлт  мың бұралып билеп ала жөнеледі... Алатау... Ақша бұлт... Осының бәріне  ессіз ризашылық танытып жатқан маңғаз дүниенің керім келбетін танытқандай дерсіз... Ертегідей аппақ, әдемі әлем...   Фотоэтюдті түсірген Досжан БАЛАБЕКҰЛЫ.