Бамбук өсірген қария

Көктем Оңтүстікке ерте келеді. «Ақ киімді, денелі, ақ сақалды, соқыр, мылқау танымас тірі жанды», деп ұлы ақын айтатын қыс мұнда жоқ. Болса да қоянның құйрығындай шолақ. Содан ба, тропикалық өсімдік­тер де Оңтүстіктің топырағын жерсіне бастады. Лимон, анар, банан өсіру түк болмай қалды. Сарыағаш пен Сайрам аудан­дарында екі шаруа осы жемістерді өсіріп, мәуесін жеп жүр. Ал Кентау қаласының Хантағы ауылының тұрғыны Рахип Зайнутдинов жеті жылдан бері бамбук өсіреді. Шымкентке бір барғанда базардан тұқымын көріп, әуестікпен сатып алған екен. Солқылдаған бамбук күзге дейін жеті-сегіз метр­ден асып өсіп кетеді. Ра­хип қария оны бақшадағы көк­өністерінің сабағы жерге құламас үшін қада ретінде пайдаланатын болыпты. Содан кейін үй төбесін жабуға пайдаланған. Қоршау жасап, шар­бақ тоқуға да таптырмайды екен. Керек тастың ауырлығы жоқ деген. Солтүстіктің адамдары кино­дан, кітаптан ғана көре­тін бамбугіңіз осылайша Шым­кент­тегі шаруаның кәдесіне жарап тұр. Бақтияр ТАЙЖАН, «Егемен Қазақстан». Оңтүстік Қазақстан облысы.