2,8 млрд. теңгенің мүлігі заңдастырылды

Елімізде былтырғы қыр­күйекте бастау алған мүлікті заңдастыру шарасына атырау­лықтардың да қатысы арта түсуде. Заңдастыру шарасына байланысты құрылған комиссиялар мүшелерінің мәлім етуінше, Атырауда қазірге дейін 2,8 млрд. теңгенің 373 мүлігі заңдастырылыпты. Жалпы алғанда, атыраулықтардан 4,2 млрд. теңгенің 505 мүлкін заңдастыруға 397 өтініш берілген. Мұның ішінде 377,7 млн. тең­геге бағаланған 23 мүлікті құжат­тардың жетіспеушілігінен заңдас­тырудан бас тартылған. Соны­мен бірге, қазір комиссия мүшелерімен 109 мүлікке қатысты 72 өтініш қарастырылып жатыр. Бұл өтініштердегі көрсетілген мүліктердің жалпы құны 1,1 млрд. теңгені құрайды. Мүліктерді заңдастыруға байланысты өтініштердің басым бөлігі, яғни 303-і Атырау қаласы тұрғындарының үлесіне тиеді. Қала тұрғындары 152 тұрғын-жай мен коммерциялық бағыттағы әртүрлі 126 нысанды заңдастыруды көздепті. Ал Құрманғазы ауданынан – 33, Қызылқоғадан – 21, Иса­тайдан – 20, Жылыойдан – 15, Махамбеттен – 3 және Ма­қат ауданынан 2 өтініш түсіпті. Бір қызығы, Индер ауда­нының тұрғындарынан мүлікті заңдастыруға бірде-бір өтініш берілмепті. Сондай-ақ, атыраулықтар тарапынан шетелдердегі мүлікті, не қаржыны заңдастыру туралы өтініш те түспепті. Жолдасбек ШӨПЕҒҰЛ, «Егемен Қазақстан». Атырау облысы.