Бүгінде цифрлық технологияның адам өмірінің барлық саласына еніп, күнделікті күйбең тіршілікті жеңілдетіп жатқан игілігі аз емес. Бірақ нағыз прогресс – техникалық жетістік қана емес, адамға, әсіресе ерекше қажеттілігі бар жандарға пайдасы тигізуге тиіс. Жуырда Семей қаласындағы №50 жалпы орта білім беретін IT мектеп-лицейінің 7-сынып оқушылары Айару Рақымбекова мен Ақбота Мұратова «Helping Hand App» мобильді қосымшасын әзірлепті.
Бұл қосымша көру қабілеті төмен адамдардың күнделікті өмірін жеңілдетуге бағытталған. «MIT App Inventor» платформасында жасалған жоба дауыстық хабарламалар арқылы ақпарат беріп, пайдаланушыға күнделікті тапсырмаларды орындауға көмектеседі екен. Интерфейсі қарапайым, басқару жүйесі ыңғайлы. Телефонға QR-код арқылы оңай орнатылады.
– Бұл жоба біз үшін тек технологиялық тәжірибе емес. Біз ең алдымен адамдарға пайдасы тисін деп ойладық. Алдағы уақытта қосымшаны жетілдіріп, қолданыс аясын кеңейтуді жоспарлап отырмыз, – дейді оқушылар.
Жас өнертапқыштардың жетекшісі, информатика пәнінің мұғалімі Айнұр Сарғызова шәкірттерінің ынтасы мен жауапкершілігі жоғары екенін айтады.
– Олар ойға алғанын іске асыру үшін көп ізденді. Бағдарламалауды, интерфейс құруды, дыбыстық хабарламалар жүйесін үйренді. Мұндай жобалар балалардың адамгершілік пен жаңашылдықты қатар ұстауға үйретеді, – дейді педагог.
Мұндай игі бастамаларды насихаттау – еліміздегі ғылым саласын дамытуға серпін беретіні рас. Өйткені біз кейде болымсыз нәрсені талқылап, шын мәніндегі ізгі істерді елемей жатамыз. Ал кішкентай болса да бір жаңалық ойлап тауып, өзгелердің өмірін жеңілдетуге талпынған балалардың еңбегі бағалауға тұрарлық.
Мектеп қабырғансында осындай жаңалықтар ашу үшінде техникалық мүмкіндік мол болуға тиіс. Семей қаласындағы бұл мектепке KAZ Minerals компаниясы жалпы құны 24 млннан астам қаржылай қолдауымен 11 кәсіби монтаж компьютері, 5 робототехника столы, роботтық бағдарламалардың сынақ алаңдары, ортаңғы сыныптарға арналған жабдықтар, бастауыш сыныптарға арналған арналған сынақ алаңдары, ғылыми жобаларға арналған 100 арнайы жинақ, бес арнайы бағдарламаға арналған ноутбук, штативтер, кәсіби жарық, микрофондар, кәсіби камера, дрон, дрон-рессинг жабдықтары, ересек сыныптарға арналған робототехниканың бастапқы, қосалқы және құрастырушы жинақтары сыйға берілді.
«Барлық сыйлықты жастарына қарай бірнеше кәсіби сыныптарға бөліп тарату жоспарланып отыр. Мультимедиа кабинетіндегі әр қабырға подкасттарға, мектеп жаңалықтары мен айдарларға арналып дайындалуда», дейді мектеп директоры.
Оның айтуынша, мектепте информатиканы оқытатын 11 ұстаз бар. Олар оқушылармен қосымша робототехника, 3D-модельдеумен айналысады. Балалар топта және оқудан тыс дәрістерде белсенді оқып, жақсы нәтиже көрсетіп жүр. Биыл жоғары топта сайыстарға қатысатын екі команда дайындау және роботехниканың басқа сайысына қатысатын тағы екі команда жасақтау, сол арқылы жарыстардың халықаралық кезеңіне шығу жоспарда екен.
Абай облысы
