Фото: istockphoto.com
Бұл туралы Өнеркәсіп және құрылыс вице-министрі Иран Шархан Үкіметте өткен баспасөз мәслихатында мәлімдеді. Оның мәліметінше, 2025 жылғы зерттеулер нәтижесінде еліміздің қоры 98 тонна алтынмен, 36 мың тонна мыспен және 1,3 миллион тоннадан астам фосфоритпен толыққан.
Ел картасында пайда болған жаңа байлық көздері – Көкжон, Алтын-Шоко, Самомбет, Студенческий және Тақыр-Қалжыр кен орындары енді ресми түрде мемлекет меншігінде. Сонымен қатар Қарағанды облысында әлемдік нарықта сұранысқа ие сирек кездесетін металдардың жаңа учаскесі табылды.
«Біз жер қойнауын зерттеу ауқымын кеңейтіп жатырмыз. 2026 жылға қарай зерттелген аумақ көлемін 2,2 миллион шаршы шақырымға жеткіземіз», деді Иран Шархан.
Қазынаны іздеу жұмыстары мұнымен тоқтамайды. Үкімет геологиялық барлаудың жаңа деңгейіне өту үшін резервтен 240 миллион теңге бөлді. Ендігі кезекте Ұлттық геологиялық қызмет заманауи аэрогеофизикалық технологияларды қолданып, жер астындағы байлықты әуеден-ақ анықтайтын болады.
2026-2028 жылдар аралығында тағы 100 мың шаршы шақырым жерді егжей-тегжейлі тексеру жоспарланып отыр.
