Атырауда Нұржан Өркешбаевтың үйлену тойы өтті

АТЫРАУ. 11 тамыз. Атырау облысында 9 жасында 90-дағы қариядай қартаю сырқатына ұшыраған Нұржан Өркешбаевтың үйлену тойы өтті. Бұл туралы egemen.kz тілшісі хабарлады. 2000 жылы Қызылқоға ауданының Мұқыр ауылдық округінде тұратын Нұржан Өркешбаевтың  ерте қартаю синдромына ұшырағаны анықталды. Содан бері оның тағдыры көпшіліктің көз алдында өтіп келеді. Оған прогерия (терінің ерте қартаюы) сырқаты деген диагноз қойылған соң бірнеше рет ем қабылдады. 2011 жылдың аяғында «Ниссамед» емханасында 2 кезеңнен тұратын кешенді косметологиялық операция жасалды. Жақында, дәлірек айтқанда, 7 тамызда Нұржан Өркешбаев Әсемгүл есімді аруға үйленіп, шаңырақ көтерді. Үйлену тойы Нұржанның ата-анасы тұратын Мұқыр ауылында өтті. Тойға шақырылған 300-ге жуық қонақтың арасында ресейлік «Пусть говорят» бағадарламасының жүргізушісі Андрей Малаховқа да шақыру билеті жіберілген еді. Өйткені, бұдан 4 жылдай бұрын Нұржан Өркешбаев аталған телебағдарлама хабарына қатысты. Сол кезде бағдарлама жүргізушісі Андрей Малахов оның үйлену тойына келуге уәде берген болатын. Ресейлік тележүргізуші қазақ баласының тойына келе алған жоқ. Дәл осы уақытта шетелде демалыста жүрген ол жас отау иелеріне арнайы сыйлық жолдайтынын хабарлапты. Жолдасбек Шөпеғұл. Дерек, сурет: egemen.kz.