ШЕШІМІН КҮТКЕН МӘСЕЛЕЛЕР АЗ ЕМЕС

Премьер-Министр Кәрім Мәсімов Қостанай облысында болды Премьер-Министр Кәрім Мәсімов Қостанай облысындағы сапарын Ресеймен шекарадағы “Қайрақ” кеден бекетінен бастады. Онда  Үкімет басшысы Кеден одағы шеңберіндегі  кеден, ше­кара және салық қызметтерінің жұмысымен жақынырақ таныс­ты. Қостанай қаласынан 170 шақы­рым жердегі Қарабалық ауда­нын­да орналасқан “Қайрақ” кеден бекеті шекарадан жүк өткізу маңызына қарай еліміздегі ең ірі үш­тікке кіреді. Ресеймен ше­карадағы 300 шақырым аумақ­ты қадағалайды. Бұл кеден беке­тінен тек жүк көліктері ғана емес, кү­ніне қырық шақты  жо­лаушылар автобусы және  жүз­деген жеңіл көліктер өтеді. Кеден одағының құрылуы  “Қайрақ” кеден беке­тін­дегі жұмыстың да жаңаша ұйым­дастырылуын талап етті. Қазір жүк көліктері бұрын­ғыдай  бекетте иіріліп тұрмайды, тез өтіп жатыр. Ал  жолаушы аза­маттар тек­серуге байланысты  сәл аялдайды. – Қазақстан – тәуелсіз мем­лекет. Сондықтан шекарадағы ел қауіпсіздігін қамтамасыз ететін жұмыстар сол күйінше атқары­ла­ды, бүгінгі сөз тек кеденге ғана қатысты болады, – деді Пре­мьер-Министр Кәрім Мәсімов. Кез­десуде Үкімет басшысына Қаржы министрлігі Кедендік бақы­лау комитетінің төрағасы Қозы-Көр­пеш Кәрбозов, Қаржы министр­лігі Салық комитетінің төрағасы  Дәулет Ерғожин және Ұлттық қауіпсіздік комитеті Ше­кара қыз­меті директорының орын­басары Талғат  Есетов Ке­ден одағы жағ­дайындағы жүзеге асып жатқан жұмыстарды баян­дап берді. – Кеден одағы шартына сәйкес бірінші шілдеден бастап кеден бекетінен өтетін жолау­шы­лар мен жүк көліктері декла­ра­ция толтырмайды, оларды есепке алып, тіркейміз де өткіземіз. Кедендік 12 бақылау түрінің қазір 9-ы қалды. Жыл аяғына дейін оларды сатылап азайтамыз да, 2011 жылдың басында жүктер мен жолаушыларды түгелдей кедер­гісіз өткізуге  көшеміз, – деді Қаржы министрлігі Кедендік бақылау комитетінің төрағасы Қозы-Көрпеш Кәрбозов. Кеден жұмысымен таныс­қан­нан кейін Премьер-Министр Кәрім Мәсімов республикалық және облыстық ақпарат құрал­дары­ның өкілдеріне  қысқа  сұх­бат берді. – Мен Кеден одағына кіруі­міз­ге байланысты Елбасының тапсырмасымен Ресей шека­ра­сындағы “Қайрақ” бекетінің жұ­мысын өзім көріп, танысу үшін келдім. Жаңа талаптағы жұмыс жаман ұйымдастырылмаған се­кіл­ді. Адамдар Кеден одағы бер­ген тиімділік пен қолайлылықты се­зі­ну­ге тиіс. Істің о бастағы мақ­саты да осы, – деді Кәрім Мәсімов. Кеден одағы шеңберінде жұмыстар енді басталды. Мұның ел экономикасы мен бизнеске тиімділігінің болатыны айтылып жатыр. Ал Кеден одағының құрылуына байланысты Қазақ­станда қандай да бір пробле­ма­лар туындауы мүмкін бе? Бри­фингте Үкімет басшысына жур­налистер осындай  сауал қойды. – Кеден одағы – бұл қоғам­дағы жаңа көрініс, жаңа іс. Осы кезге дейін оның барлық заң­намалық негізі жасалды, яғни ке­лісімдерге қол қойылды. Деген­мен барлығы қағазда мінсіз, ал өмірде кедір-бұдыр болып жатса, бұл еліміздің экономикасы үшін де, адамдар үшін де оңайға соқ­пайды. Сондықтан шекара, кеден қызметтері басшылары  бірлесіп, проблемаларды дер уақытында анықтап, оның дер уақытында оң шешімін іздестіруіміз керек. Ке­ден одағындағы әріптестермен бірігіп анықталған пробле­ма­лардың илеуін қандырғанымыз абзал, – деді Кәрім Мәсімов. Үкімет басшысы “білмеген жердің ой-шұқыры көп” деген­дей, Кеден одағының алғашқы кезінде шикілі-пісілі сәттер бо­луы әбден мүмкін екенін ескерт­ті. Әзірге кеткен қателіктерді жөндеу жұмыстары жүргізіледі, көш жүре түзеледі деген сенім бар. Деген­мен, Премьер-Ми­нистр Кеден одағының ұтымды жақтарын адам­дар мен бизнес саласы сезі­нуі керектігін нақты­лап қойды. Сонымен қатар Кә­рім Мәсімов тәжірибе жинақ­тал­ғасын,  Кеден одағындағы  әріп­тес­термен екі жақ­ты  кездесулер ұйымдасты­рылатынына сенім білдірді. Мұнан кейін Кәрім Мәсімов облыс орталығындағы “Қостанай су” мемлекеттік коммуналдық  кәсіпорнына барды. Онда облыс әкімінің орынбасары Виктор Мейестр Үкімет басшысын қала­ны ауызсумен қамтамасыз етудің жай-жапсарымен таныстырды. Бұрын қала жерасты суын пайда­ланатын, қазір  тұрғындар мен кәсіпорындарға берілетін судың 80 пайызы ашық су қоймасынан да, қалғаны скважиналардан алынады. Ауыз су тарифін не­гізсіз өсірмеу  үшін облыста жұ­мыстар жүргізілуде. Қостанай қаласы табиғи газ­бен жылытылады. “Кісідегінің кілті аспанда” дегендей, сырттан алынатын  көгілдір отынның  ба­ға­сы тұрғындар үшін де амалсыз өзгеріп отырады. Осыған бай­ла­нысты Виктор Мейестр тарифті тұрақтандыру үшін  субсидия  болса дегенді жеткізді Үкімет бас­шысына. Кәрім Мәсімов бұл мәселенің алдағы уақытта Үкі­метте қаралатындығын айтты. Жыл басынан бері облыстағы денсаулық сақтау саласы бірың­ғай ұлттық жүйені іске асыруға кіріскен. Бұл Үкімет басшысы Қостанай қалалық перзент­ха­на­сына келгендегі әңгіме желісіне айналды. Алдымен жаңа жүйенің талабы бойынша  барлық ауру­ханалар мен  емханалар аккреди­тациядан өтті. Оған  жөндеуден өткен, науқастарға қызмет көр­се­туге барлық әлеуметтік  жағдай жасалған  емдеу мекемелері ғана жауап бере алады. Облыста осыған сәйкес барлық  аудандық ауруханалар мен ФАП-тарда жөндеу жүргізілді. Кездесуде  Мең­діғара аудандық ауруха­на­сының бас дәрігері Әнуарбек Ахметов ауылдық жердегі жаңа жүйенің қадамын баяндап берді. Алғашқы екі айда қиын болғаны­мен, қазір дәрігерлер де, тұрғын­дар да бұл жүйенің тиімділігін түсініп келеді. Соңғы екі айда дәрі-дәрмекпен қамтамасыз ету жақсарды. Дәрігерлерді тыңдап болған­нан кейін Кәрім Мәсімов ден­саулық сақтау саласындағы мін­деттерге тоқталды. – Алдағы бес жылда осы бірыңғай ұлттық жүйемен жұмыс істейміз және оның ең тиімді жақтарын жетілдіретін боламыз, – деді Кәрім Мәсімов. Салаға  бюджеттен бөлінетін қыруар ақшаның 80 пайызы  туберкулез, жүрек-қан тамыр­лары, жарақат сияқты аурудың бірнеше түрін емдеуге ғана кетеді екен. Қаржыны тиімді жұмсау үшін осындай кең тараған ауру түрлерінің  алдын алуды, профи­лактикалық жұмыстарға басым­дық беру керектігін ескертті Үкімет басшысы. – Оның ең жақсы жолы – саламатты өмір салтын қалып­тастыру, – деді Кәрім Мәсімов. – Сол үшін спорт, аула клуб­тарының жұмыстарын жандан­дыру керек. Бұл орайда отбасы,  мектеп, денсаулық сақтау, білім, спорт, мәдениет салалары атқа­ратын істер  бір арнаға  то­ғы­сады. Жақында ғана Қостанай ауда­нында “Қарасу-Ет” қасапханасы және ет өңдеу кешені ашылған болатын. Премьер  жаңа кәсіп­орында да болды. Бұл инвести­ция­лық жобамен салынған кә­сіпорын жылына 5,4 мың тонна ет өндіреді. Осында жиналған ауыл шаруашылығы тауар өн­діру­шілерімен кездесуінде Кәрім Мәсімовке Қазақстанның Еңбек Ері Сайран Бұрқанов биылғы жылдың құрғақшылығына байла­нысты  жемшөп дайындаудың қиын­дығын жеткізді. Әсіресе, жеке сектордағы малдың амал­сыздан пышаққа ілінетін түрі бар. Тоннасы 15-20 мың теңгеге жеткен шөпті қалай аларын біл­мей ауылдағы ағайын аңтарылып отыр. Осыған байланысты жи­налғандар жемшөпке мемлекет­тен субсидия сұрады. Кәрім Мәсімов Ауыл шаруашылығы министрлігіне  құрғақшылыққа бай­ланысты жемшөп дайындау үшін шаруаларға субсидия беру мәселесін қарауды тапсырды. – Жемшөп болмаған соң малдың басы кемиді. Бұл ма­ңыз­ды проблема. Оны біз шешеміз деп ойлаймын, – деді ол. Мұнан кейін Премьер-Ми­нистр  мінген тікұшақ Арқалық қаласына беттеді. Онда Премьер-Министрдің бағдарламасы то­лық­қанды болды. Ол “Қайрат” спорт кешеніне, Ы.Алтынсарин атында­ғы  мемлекеттік педагоги­ка инсти­тутына барды. Содан кейін Торғай боксит кен басқар­масының  өндіріс аймағында болды. Кәрім Мәсімов “Қайрат” спорт кешенінде арқалық­тық­тарға саламатты өмір салтын қам­­тамасыз ету үшін  жақсы жағ­­дай жасалғандығына  куә болды. Мұнда жас боксшыларды белгілі боксшы Болат Жұмаділов бау­ли­ды. Үкімет басшысы оны әңгі­ме­ге тартты. Болат кәсіпкер Қ.Бо­ранбаевтың шақыртуымен Арқа­лықта былғары қолғап шеберлері мектебінің негізін қалау үшін арнайы келіп жұмыс істеуде. Премьер-Министр боксшыға табыстар  тіледі. Ы.Алтынсарин атындағы Арқа­лық педагогика институты – Тор­ғай өңірін педагог мамандармен қамтамасыз етіп отырған оқу ор­ны. Соңғы екі жылда мұнда  оң өз­герістер болды. Институт ғима­ратын аралаған Кәрім Мәсімов оқу орнының бай материалдық базасы мен жөндеу жұмыстарын көрді. Премьер-Министр Қазақ­стан­дағы жоғары оқу орындары алдында дамудың жаңа сатысына көтерілу мақсаты тұрғандығын  айт­ты. Оқытушылар ұжымы оқу үдерісіне жаңа технологияларды енгізіп, жетістіктерін тиімді пай­даланса ғана олардың сапалы әрі білікті жас мамандар дайындай алатынын ескертті. Осы инсти­тут­тың соңғы жылдары  айқай-шудан ада болып, даму жолына түсуіне көп еңбек еткен ректор Жасұлан Шаймер­деновтің Білім және ғылым министрлігімен жасаған шарты аяқталып келеді. Білім ордасының жас  оқытушылары Премьер-Министрге ректорды өздерінде қалдыруға өтініш айтты. – Игілікті істер тындырып отыр­ған жерден ректорды қозғай берудің де жөні бола қоймас, сон­дықтан  өтініштеріңіз орындалды деп біліп,  менің құттықтауымды қа­был алыңыздар, – деді Кәрім Мәсімов. Осы кездесуде Премьер-Ми­нистр Кәрім Мәсімов арқа­лық­тықтарға “Арқалық-Шұбаркөл” темір жолы­ның құрылысы түсе­тіндігі туралы ақжолтай хабарын жеткізді. Үкіметте қаралып жатқан жоба бойынша енді Арқалық көлік тұйығынан транзиттік бекетке ай­налмақ. Осы кездесуде облыс әкімі Сергей Кулагин Арқалық қала­сы­ның қиын уақытты артқа тастауы­на Үкіметтің беріп отырған көме­гіне  рахмет айтты. Арқалық қазір  баяғыдай қыста бүрсеңдеп тоңып отырмайды, жылу мәселесі шеші­мін тапқан. Соңғы жылдары екі коммуналдық үй берілді, биыл тағы да бір үйдің кілті тапсы­ры­лады. Ірі инвестициялық жоба­лар­дан Арқалық та сырт қалып отыр­ған жоқ, сонымен қатар “Ар­қа­лық-Торғай” тас жолы төселіп жатыр. Торғай боксит кен басқар­ма­сының директоры Виктор Родин кәсіпорындағы экономикалық және әлеуметтік көрсеткіштермен қонақтарды таныстырды. Кәрім Мәсімов кеншілермен кездескенде Үкіметтің Арқалық қаласын қар­жы-көмегінсіз қалдырмайтынын айтты. Ал арқалықтықтардың  мін­деті Президент алға қойып отыр­ған міндеттерді орындауға барынша үлес қосу болмақ. Әрине, Үкімет басшысына қай облыста да алдымен тәуір жұмысты көрсетуге тырысатыны түсінікті. К.Қ.Мәсімовтің өз пікірін өз көргендері бойынша айтатыны да түсінікті. Бірақ біз облыста атқарылған істер баршылық екенімен бірге шешімін күткен мәселелер де аз еместігін жақсы білеміз. Негізгі назар да осы мәселелерге аударылуға тиіс. Тоқмейілсушілік жарға жықтырмай қоймайтынын мұндағы басшылар да білеріне сенгіміз келеді. Нәзира ЖӘРІМБЕТОВА, ҚОСТАНАЙ.