Компанияның дерегіне сүйенсек, 2025 жылдың қорытындысы бойынша 5G Kcell желісіндегі деректерді беру көлемінің үштен біріне жуығын қамтамасыз еткен. Бұл 5G-дің «сынақ үшін» ғана емес, күнделікті пайдаланылатын технологияға айналғанын аңғартады. Әсіресе байланыс сапасына талап жоғары сервистерде: видеоқоңырау, ағындық видео, бұлттық сервистер және цифрлы төлемдер.
Қамту аумағы да кеңейіп келеді. 5G тек облыс орталықтарында емес, облыстық және аудандық маңызы бар қалаларда да іске қосыла бастады. Мысалы, Қаскелең, Жаңаөзен, Құлсары, Сәтбаев, Қарқаралы және басқа да қалалар. Мұндай қалаларда тұрақты мобильді интернет – жай ғана ыңғайлылық емес. Ол цифрлы қызметтерге қолжетімділікті арттырып, үлкен қалалар мен өңірлер арасындағы теңсіздік айырмасын азайтуы мүмкін.
5G-ді дамыту айтарлықтай инвестицияны талап етеді. Kcell деректеріне сәйкес, соңғы үш жылда 5G желісін дамытуға салынған қаржы 180 млрд теңгеден асты. Осы тұста тариф саясаты да назарда: компания салық кодексі өзгеріп, ҚҚС мөлшерлемесі көтерілген жағдайда да тарифтік жоспарлардың бағасын өсірмегенін атап өтеді.
Нарықтағы жалпы көрініс те бұл мәселенің неліктен өзекті екенін көрсетеді. DataReportal/Kepios бағалауынша, 2025 жылдың соңында Қазақстанда 27,3 млн мобильді қосылу болды (131%), интернетті 19,5 млн адам пайдаланды (93,4%), ал әлеуметтік желі аудиториясы 16,9 млн-ға жетті (80,8%). Мұндай жағдайда теңсіздік «интернет бар/жоқ» дегеннен гөрі «интернет қаншалықты сапалы» деген өлшемге көшеді. Сондықтан 5G-ді жеделдетіп енгізу және қамтуды ірі қалалардан тыс жерлерге де тарату – инфрақұрылымның өсіп келе жатқан цифрлы сұранысқа дайындығын көрсететін белгі.
