КӨКЕЙКЕСТІ ӘРІ МАҢЫЗЫ ЗОР МІНДЕТ

Жақында Норвегияның астанасы Осло қаласында ЕҚЫҰ Парламент­тік Ассамблеясының жыл сайынғы сессиясы өз жұмысын бастаған бо­ла­тын. Кезекті 19-шы сессия барысында Қазақстанның Ұйымға төрағалығына жоғары баға берілгенін бұған дейін хабарлаған едік. Бүгін аяқталатын алқалы жиын барысында Қазақстан тарабы “Құқықтың үстемдігі: трансұлттық қылмыспен және коррупциямен күрес” тақырыбында баяндама жасады.Бұл баяндаманы ЕҚЫҰ-ның Іс басындағы төрағасы, Қазақстан Республикасының Мемлекеттік хатшысы – Сыртқы істер министрі Қанат Саудабаев жасауы тиіс бо­ла­тын. Бірақ Қазақстанда өтіп жатқан бірқатар ірі халықаралық шараларға және 16-17 шілдеде Алматыда өтеді деп жоспарланған ЕҚЫҰ-ға мүше мемлекеттер Сыртқы істер ми­нистр­лерінің бейресми кездесуінде жан-жақты дайындықтарға байла­нысты Қ.Саудабаевтың Ослоға атбасын тіреуге  мұршасы болмады. Сондықтан, ол өзінің сөзін ЕҚЫҰ Бас хатшысы М.П. де Бри­шам­бо­ның оқып беруіне өкілеттік етті. Мен Парламенттік Ассамблея бүгінгі күннің аса көкейкесті және маңызды мәселелерінің бірін тал­қылауға бастама көтеріп отыр деп есептеймін, делінген ЕҚЫҰ Іс ба­сын­дағы төрағасының сөзінде. Заң­ның үстемдігі адам өлшемі сала­сында өте маңызды. Сессия тақы­ры­бына сәйкес және күн тәртібін­дегі мәселеге орай мына үш мәсе­леге баса назар аударғым келеді: – Қырғызстан және ЕҚЫҰ-ның алдын алу әлеуетін іске қосу қажеттігі; – Корфу үдерісі бойынша пікір­таластар қорытындысы; – Алматыдағы алда өтетін ми­нистрлердің бейресми кездесуі мен ЕҚЫҰ саммитін өткізу. Іс басындағы төрағаның сөзін оқыған Бас хатшы заңның үстем­ді­гін қамтамасыз ету қажеттігі жа­қында Қырғызстанда орын алған қайғылы оқиғалар барысында анық байқалғанын атап көрсетті. Бұл де­мо­кратиялық институттардың әл­сіз­дігінен, экономикалық дамудың тұрақсыздығы мен коррупциядан бастау алып отыр. Ал бұл өз кезе­гінде трансұлттық қылмыстың өсуіне алып келуі әбден мүмкін. Қ.Саудабаев осындай тұрғыда қауіп білдіре келіп, Қырғызстандағы ахуал­ды тұрақтандыруға байланыс­ты төрағалық етуші ел – Қазақстан тарапынан атқарылған жұмыстарға тоқталып өтті. Сөйтіп, Қыр­ғыз­стан­да референдум өткізуге қол жет­кізілді. Енді ел бейбіт даму жолына түседі деуге негіз бар. Екіншіден, “Корфу процесі” жалғасу үстінде. Ол Ұйымға қаты­сушы мемлекеттер өзара сенімді нығайтып, ЕҚЫҰ-ның тиімділігін арттыруға көмектесетін маңызды тетіктердің бірі болып табылады. Бұл, әсіресе, Еуроатлантикалық және Еуразиялық қауіпсіздік мә­селесінде маңызды. Корфу про­цесіне байланысты жүргізілген ашық үнқатысу барысында ЕҚЫҰ үшін аса көкейкесті он мәселе тал­қыланды. Бұлар трансұлттық қауіп-қатерлер, жанжалдар, қауіпсіздік пен қару-жараққа бақылау орнату, экономика мен экология, гумани­тарлық сала, өлшемаралық қадам­дар мен оның тиімділігі, Еуро­ат­лантикалық және Еуразиялық қауіпсіздік, т.б. Іс басындағы төрағаның жол­дауы бойынша сөз саптаған М.П. де Бришамбо қорытындысында Ұйым аясында шешімін күткен өткір мәселелер бойынша  өтуі үстіміздегі жылдың қазан айына жоспарланып отырған ЕҚЫҰ саммитіне үлкен үміт артылатынын атап өтті. “Егемен-ақпарат”.