1941 жылғы 21 маусымда отырғызылған терек

Ұлы Отан соғысы 1941 жылы 22 маусымда таңғы сағат төрт кезінде, жұрт шырт ұйқыда жатқан кезде басталғаны тарихтан белгілі. Сол соғыс басталардан бір күн бұрын Семейдегі №1 Чернышевский атындағы мектептің түлектері білім ордасының ауласына бізден естелік деп терек көшетін отырғызған. Содан бері 75 жыл өтіп отыр. Сол күні 21 маусымда 10 сыныпты оншақты ғана бала бітірген, аяныштысы – барлығы да бірдей 22 маусым күні соғысқа шақыртылып, бірден аттанған. Көшет болса бүгінде қарияға айналғандай. – Бұл теректің тарихы жыл сайын ұрпақтан-ұрпаққа ауызша айтылып, түсіндіріліп келеді, – дейді №1 мектеп директорының орынбасары Зульфия Бехтольд, – осы арқылы біз оқушыларымыздың патриоттық сезімін шыңдаймыз. Биыл бұл терек ағашының айналасы қоршалып, естелік ретінде мемориалдық тақтайша ілінді. Осы мектептен соғысқа аттанғанның бірі Кеңес Одағының Баты­ры Владимир Засядько, ол тірі бол­ған­да 96 жасқа толар еді.  Мектептің тағы бір аты аңызға айналған түлегі мар­құм Леонид Афанасьев, ол эскадрилья командирі болған, «Тени исчезают в полдень» фильміне музыка жазған композитор ретінде Одаққа танымал еді.  Раушан Нұғманбекова. Семей.