БАЛА КӨПТІК ЕТПЕЙДІ, БІРАҚ БАҚША ЖЕТПЕЙДІ

Айтайын дегенім... Бүгінде елімізде “Балапан” бағ­дарламасы жұмыс істеп жатыр. Бір­ақ ол проблеманы бір десте шешіп тастай алмайтыны түсінікті. Осы рет­те Қазақстанның өзге қала­ла­рын­дағыдай, Семейде де балабақ­ша­лар қажеттігі туындап тұр. Ата-аналарға бәрібір, тілі орысша ма, қазақша ма, таңдап жатуға шама жоқ, әйтеуір балаларын балабақ­ша­ға іліндірсе болғаны. Міне, екі жылдан бері сәбилерді балабақшаға беру үшін кезекке жазатын қалалық білім бөлімінде арнайы жұмыс ұйымдастырылуда. Қазірдің өзінде онда тізім бойынша балабақшаға баруы тиіс 5000-нан астам бала ке­зекте тұр. Тіпті өткен жылы бала­бақшаларға орналастырылған 600 баланы есепке алмағанның өзінде, дәл қазірге дейін туған сәбилерді туа салысымен кезекке жазып қойыпты. Басқа амал жоқ. Былтыр 2-4 жас аралығындағы 500-дей ба­ланың ғана балабақшаға орналасу мүмкіндігі болды. Жүздеп емес, мыңдап жазылған кезекке қарап, жағдай егер осы күйде қалса, бала­лардың көпшілігі балабақшаның не екенін білмей өсуі мүмкін. Шынына келгенде, Семейдегі көптеген балабақшалар оңтайлан­ды­ру кезінде сатылып, жекеше­лен­дірі­ліп кеткен. Қазір ол жерлерде шағын және орта бизнес нысан­дары, түрлі мекемелер орналасқан. Сондықтан да жаңа ғимараттар салынса, бұл жақта педагог кадрлар жеткілікті. Өткен жылдың тамыз айында “Юность” кентінде 320 орындық жаңа балабақша ашылды. Әзірше бұл теңізге тамған тамшы іспеттес. Семейліктер өздерінің әлеуметтік жағдайларына сәйкес, балаларын ақшасын аздау төлейтін мем­ле­кет­тік балабақшаларға орналастыр­ғы­сы келеді. Қала бойынша мұндай балабақша саны – 12. Жекемен­шікте 3 балабақша бар, бірақ онда ақы 19-25 мың теңге көлемінде. Қалалық білім бөлімі мамандары­ның хабарлауынша, балабақша­ларға орналастыру үшін қазір арнайы комиссия жұмыс істеп жатқан көрінеді. Қалай десек те, Семейде балабақшалар мен бөбекжайлар саны артса, нұр үстіне нұр болар еді. Өйткені, осы кезде біреу тәрбиеші жалдап, ал біреулер балаларын ата-апаларына немесе таныстарына тасып әуре болып жүргені рас. Раушан НҰҒМАНБЕКОВА, СЕМЕЙ.