Ұлттық академиялық кітапханада Марал Хасен қоры бар. Қаламгердің соңында қалған кітаптарының таңдаулыларын осында өткізіп, ресми тіркетіп жүрген жары – Рымбала апай. Бұл кісі жары дүние салған соң, қасиетті ісін жалғастырып, Нобель сыйлығының лауреаты Светлана Алексиевичтің «Цинковые мальчики» повесін қазақша сөйлетті (2017). Сондай-ақ Гарри Грейдің «Оданжды в Америке» бестселлерін (2021), Нұрайна Сәтбаеваның «Серебряная тамга Альки» (2022) әңгімелер жинағын, Илмаз Даниялұлының «Начало. Дастан и Арман» тарихи сагасын (2023) аударса, осы жолы атақты Виктор Гюгоның «Париждегі Нотр-Дам соборын» қазақшалапты.
«Аманат арқалаған ана» атты шығармашылық кездесу кеште аталған аударма кітабының тұсаукесер рәсімі өтіп, оқырманның қолына тиді. Кездесуді «Астана ақшамы» газетінің шолушысы, журналист Аманғали Қалжанов жүргізді. Аудармашының басқа да еңбектерін кіріктіре сөйлеген модератор әуелі Ұлттық академиялық кітапхана директоры Күміс Сейітова мен жазушы Айгүл Кемелбаеваға сөз берді. Күміс ханым Рымбала апайды құттықтап, Мәдениет және ақпарат вице-министрі Рустам Алидің Алғысхатын тапсырды.
«От басы, ошақ қасын әдебиет атты ұлы ұғымның ордасына айналдыру екінің бірінің қолынан келе бермейді. Марал Хасендей аудармашы әрі өте білімдар адамдар да бұрыннан көп болмаған, бірақ Құдайға шүкір, барына қуанамыз. Сондықтан халықтың сана-сезімін көтеруге, әдебиет пен руханиятқа қызмет еткен сіздің еңбекті өз басым жоғары бағалаймын әрі әрдайым тілектеспін», деді жазушы Айгүл Кемелбаева.
Журналист Мағжан Садыхан да Марал Хасеннің кісілік келбетіне кеңінен тоқталып, Рымбала апайдың еңбегі қастерлеуге тұратын мұраға айналып кеткенін лепес етті. Аудармашы, драматург Кенжебай Ахмет, басқа да тұлғалар авторға ақжарма тілектерін жеткізді.
