«Қазақстан» РТРК Геннадий Головкиннің жақын арада өтетін екі жекпе-жегін тікелей эфирден көрсету құқығына ие болды.
Қазақстандық кәсіпқой боксшының америкалық кіші Вилли Монромен кездесуін «Қазақстан» телеарнасы тікелей эфирден мамыр айының ортасында көрсетеді. 17 мамыр күні таңертең аталған телеарна биылғы жылғы басты бокс айқастарының бірі – орта салмақтағы WBA және IBO тұжырымы бойынша әлем чемпионы Геннадий Головкин мен орта салмақта «Boxcino-2014» турнирінің жеңімпазы 28 жастағы кіші Вилли Монромен жекпе-жегін Лос-Анджелес қаласынан тікелей эфирде ұсынады. 17 мың адам сиятын Лос-Анджелестің (АҚШ) жаңартылған «The Forum» аренасынан үлкен бокс кеші 17 мамырда сағат 07.00-де «Қазақстан» телеарнасынан көрсетіледі. Ал Головкин мен кіші Монроның кездесуін шамамен таңғы 09.00-де тамашалауға болады. Ескерте кететін нәрсе, тікелей эфирден берілген жекпе-жекті жіберіп алған жанкүйерлер трансляциялардың қайталауын 17 мамыр күні күндізгі және 18 мамыр күні кешкі уақытта «Кazsport» телеарнасынан көре алады. Г.Головкин – Қарағанды қаласының тумасы, қазақстандық боксшы, 2003 жылы әуесқойшылар арасында әлем чемпионы және 2004 жылы Олимпиада ойындарының күміс жүлдегері. Қазақстан Республикасының еңбек сіңірген спорт шебері, еліміздің 7 дүркін чемпионы, халықаралық турнирлердің жеңімпазы. 2013 жылы 24 сәуірде Қазақстан халқы Ассамблеясының XX сессиясында боксшы өзінің шығу тегі туралы: «Ұлтым туралы сұраған кезде, мен былай деп жауап беремін: Әкем – орыс, шешем – кәріс, ал мен – қазақпын! Менің барлық жеңісім еліме арналады, менің халқыма, Президентіме арналады!» деген болатын. Головкиннің екінші жекпе-жегі, болжам бойынша, қыркүйек айына жоспарланып отыр. Нақты күні, өткізілетін орны мен қарсыласының есімі әлі белгісіз.
Дастан КЕНЖАЛИН, «Егемен Қазақстан».
