АҚШ-та әйел адам 50 шақырым жерді жүзіп өтті

Америкалық Ким Чемберс (Kim Chambers) 50 шақырымдық қашықтықты жүзіп өткен тарихтағы ең алғашқы әйел атанды. Ол Фараллон аралынан «Алтын қақпа» (Golden Gate) көпіріне дейінгі аралықты жүзіп өтіп, судағы ең қауіпті белестердің бірін бағындырды. Тарқата айтсақ, 38 жастағы әйел салқын суға түсіп, 50 ша­­­қырым қашықтыққа жүзу жо­рығын бастады. Ал мәреге 17 сағат өткеннен кейін жеткен. «Бүкіл командам мені бас бармақтарын жоғары көтеріп, қолдап тұрды. Маған бұл ара­лықты жүзіп шығу оңай болған жоқ», – деді Ким Чемберс. Осынша уақытқа созылған жүзу барысында онымен қа­тарласып анасы мен коман­даның 16 мүшесі қайықпен жүзіп отырған. Олар қауіп төне қалған жағдайда көмекке келмекші болған. Ким Чемберс – бұрынғы балерина. Ол осыдан бірнеше жыл бұрын қайғылы жағдайға ұшырап, екі аяғы түгел жансызданып қалған болатын. Міне, сол оқиғадан кейін аяқтарын қалпына келтіру үшін Чемберс жүзумен айналысуды бастапты. Тарих беттеріне үңілсек, бұ­рын Фараллон аралы мен аталған көпірдің аралығын төрт ер кісі жүзіп өткен екен. Бұл жердің қауіптілігі, онда арал мен Сан-Франциско жағалауындағы тас­бақалармен қоректенетін үлкен ақ акулалар көптеп кездеседі. Талғат РАЙЫМБЕК.