Алматының аумағында автобустар аударылып қалды

АСТАНА. 15 тамыз. Бүгін таңертең Алматы облысында автобустың аударылып қалуы салдарынан оншақты адам зардап шекті. Бұл туралы ras.kz хабарлады. Зардап шеккендердің бәрі Қаскелеңдегі ауруханаға жеткізілген. Сонымен бірге жол-көлік оқиғасынан қаза тапқандардың жоқ екені айтылды. Кейбір ақпарларға қарағанда, автобус жүргізушісі де ауруханаға жатқызылған. Көргендердің айтуларынша, автобустың «жүргізуші жақ беті қатты бүлінген». Қазір жол-көлік оқиғасының себебі зерттеліп жатыр. Автобус салонында 40-қа жуық жолаушының болғаны анықталды. Еске сала кетейік, бүгін таңертең Алматы-Бішкек тас жолының бойында тағы бір автобус аударылып қалған. Оқиға сағат 9:00 шамасында болған. Ол Шымкенттен Алматыға қатынап келе жатқан. Оның ішінде 46 жолаушы отырған. Апат жүргізушінің жолда қалғып кеткенінен орын алған. Автобус сағатына 40 шақырым жылдамдықпен келе жатқандықтан ғана адам шығыны болмаған. Апат салдарынан 2 жүргізуші мен негізінен алдыңғы қатарларда отырған жолаушылар зардап шеккен, 10 адам ауруханаға жеткізілген, соның ішінде үшеуіне алғашқы медициналық көмек көрсетіліп, үйлеріне жіберілген. Зардап шеккендердің арасында балалар болған жоқ. Талғат Райымбек. Дерек, сурет: ras.kz.