ЮНЕСКО-ның қамқорлығымен өтетін ауқымды халықаралық форум Жошы ұлысының тарихи мұрасын және оның Орталық Еуразия кеңістігіндегі өркениеттік процестерді қалыптастырудағы рөлін жан-жақты түсіну үшін жетекші отандық және шетелдік ғалымдарды, сарапшылар мен ъалықаралық ғылыми қоғамдастық өкілдерін біріктірді.
Салтанатты рәсімде ЮНЕСКО Бас директорының орынбасарының міндетін атқарушы Элунду Ассомо Лазар сөз сөйлеп, Алтын Орданың мәдениетаралық өзара іс-қимылдың бірегей кеңістігі ретіндегі тарихи маңыздылығын атап өтті.
«Алтын Орда бұл құндылықтардың маңызды көрінісі болып саналады. Бұл дала қозғалыстың, алмасудың және өзара байланыстың серпінді орталығы болған Еуразияның кең тарихын көрсетеді. Бұл ерекше әртүрліліктің саяси және мәдени кеңістігі болды. Онда діндер, тілдер, көркемдік формалар мен технологиялар бір-бірімен астасып, өзара әсер етті. Ол бүгінгі күнге дейін мәдениетаралық диалог пен мәдени әртүрліліктің сенімді тарихи моделі болып қала береді», - дейді Элунду Лазар.
Форумға қатысушылар тарихты зерттеу тек өткенді есте сақтауға ғана емес, сонымен қатар заманауи процестер туралы тереңірек түсінік қалыптастыруға және тұрақты болашақты құруға бағытталғанын атап өтті. Сенімсіздіктің өсуіне және бөліну тенденцияларының күшеюіне байланысты жаһандық сын-қатерлер жағдайында Алтын Орда мен Жібек жолының тарихы өзара әрекеттесуі, өзара алмасуы және ашықтық арқылы мәдениеттердің нығаюының айқын мысалы болып отыр.
«Симпозиум ЮНЕСКО-ның негізгі мандатымен тікелей байланысты. Отыз жылдан астам уақыт бойы ЮНЕСКО-ның Жібек жолы бағдарламасы, Жібек жолы тек сауда жолдарының желісі ғана емес, мәдени өзара әрекеттесу мен алмасудың жарқын кеңістігі болғанын көрсетеді. Оның маңызды тораптарының арасында қазіргі Қазақстан мен көрші мемлекеттердің аумақтары болғандығы назар аудартады», - деп атап өтті Элунду Лазар.
Халықаралық симпозиумды өткізу ғылыми ынтымақтастықты нығайту, пәнаралық зерттеулерді дамыту және Ұлы Даланың тарихи-мәдени мұрасын халықаралық деңгейде ілгерілету үшін маңызды алаңға айналды.
