«Барыс» екінші ойында «Авангардтан» есе қайтарды

АСТАНА. 1 наурыз. «Барыс» Құрлықтық хоккей лигасының плей-офф кезеңінде омбылық «Авангардты» 2:0 есебімен жеңіп, қос команда арасындағы жалпы есепті 1:1-жеткізді. Бұл туралы egemen.kz хабарлады. Алғашқы кездесудегі жеңілістен сабақ шығара білген астаналықтар бұл жолы жүйелі ойын өрнегін көрсетті. Есесіне, айдын иелерінің жүйкесі сыр беріп, тартыстың небәрі үшінші минутында бір ойыншылары кіші айыппен жазаланды. Тіпті «Авангард» сапындағы неміс хоккейшісі Феликс Шютц имек таяғымен қарсыласын ұрғаны үшін 4-минутта ойын соңына дейін айдыннан қуылды. Нәтижесінде, ойыншы басымдығын ұтымды пайдаланған қонақтар есеп ашты. Алғашқы шайбаның авторы Дмитрий Уппер. Үзіліске дейін біздің команда екінші шайбаны соғып, есепті еселеді. 15-минутта Талғат Жайлауов ұйымдастырған шабуылға нәтижелі нүкте қойған Федор Полищук болатын. Ойынның қалған екі кезеңінде есеп өзгермей, «Барыс» маңызды жеңіске қол жеткізді. Астаналықтардың қақпашысы Ян Лацо 60 минуттың ішінде 37 соққыны қайтарып, қақпасын голдан аман сақтап қалды. Өз кезегінде, «Барыс» хоккейшілері қарсыластарының қақпасына барлығы 16 соққы жасағанын айта кетейік. Енді елордалық команда омбылықтарды 3-4 наурызда өз айдынында қабылдайды. «Астанадағы екі кездесуде қандай нәтиже тіркелсе де қос команда арасындағы тартыстың бесінші ойыны өтетін болды. Себебі, плей-офф кезеңінің келесі сатысына төрт рет жеңіске жеткен команда шығатыны белгілі. Сондықтан бұл кезеңде қарсыластар кем дегенде төрт, ең көбі жеті ойын өткізуге мәжбүр. Еламан Қоңыр. Дерек: egemen.kz. Сурет: hawk.ru