«Тайқазан» Әулиеата жеріне жол тартты

Алматы қаласынан «Қазақстан халқы Ассамблеясы – 20 игі іс» патриоттық акциясының символы болған киелі Тайқазан салтанатты түрде Жамбыл облысына жол тартты. Елімізді мекен еткен бірнеше ұлт пен ұлыс өкілдерінің татулығы мен тұрақ­тылығының символы, қазақ халқы­ның әлемдегі бейбіт те берекелі өмірге қосқан үлесінің тұмары іспетті қасиетті Тайқазанның кішірейтілген нұсқасы Қазақстанның ірі қалалары мен облыс орталықтарына аялдап, игілікті істерді насихаттап жүр. Сол игі акцияның аясында «Қазақстан халқы Ассамблеясы – 20 игі іс» атты республикалық патриоттық шеру Алматы қаласынан қасиетті Әулиеата жеріне жол тартты. Алматыдағы Достық үйінде өт­кен шараға қаладағы түрлі этно­мә­дени бірлестіктердің өкілдері, Ұлы Отан соғысының ардагерлері, мем­лекеттік емес қоғамдық ұйым­дардың белсенділері мен жоғары оқу орындарының жастары жи­налды. Татулық пен достықтың киелі шаңырағына айналған Достық үйін­де Қазақстанды мекен еткен әр ұлт өкіл­дерінің мәдени-шығармашылық көрме­лері қойылып, ұлттар достығын наси­хаттайтын театрландырылған шаралар ұйымдастырылды. – Ақпан айының соңында біз өзі­міздің шығысқазақстандық әріптес­терімізден Тайқазанды салтанатты түрде қабылдап алған болатынбыз. Және осы Қазақстан халқы Ассам­блея­сы құрылған күн – 1 наурызда, Ассамблеяның алғашқы сессиясы өткен қала – Алматының атқарған игі істерін Жамбыл облысына табыстап отырмыз, – деді Алматы қалалық Қазақстан халқы Ассамблеясы төрағасының орынбасары Майра Абдалиева. Шарада қалада орналасқан 34 этномәдени бірлестіктің өнерпаздары дайындаған концерттік кеш пен Ұлы Отан соғысы ардагерлеріне арнайы жасалған тарту-таралғылар, әлеуметтік аз қамтылған отбасы мүшелеріне жасалған жәрдем мен жастар ұйымының Қазақстан халқы Ассамблеясы тарапынан халыққа көрсетіліп отырған қызметін баяндайтын сахналық көріністер, ұлттық ән-би мен қолөнер шеберлерінің бұйымдары ұсынылды. Қанат ЕСКЕНДІР, «Егемен Қазақстан». АЛМАТЫ. Суретті түсірген Сәрсенбек ҚЫЗАЙБЕКҰЛЫ.