Петропавлда халықаралық сурет көрмесі өтті

ПЕТРОПАВЛ. 4 наурыз. Петропавл қаласындағы облыстық бейнелеу өнері мұражайында «Қазақстан мен Польша арасында» атты халықаралық көрме ұйымдастырылды. Аталған шара Қазақстан халқы Ассамблеясы жылына арналды. Бұл туралы Солтүстік Қазақстан облыстық мәдениет басқармасының баспасөз қызметі хабарлады. Жергілікті поляктардың «Коперник» мәдени орталығының ұйытқы болуымен өткен көрме-байқауға қос елден 273 үміткер қатысуға ниет білдірген. Жас қылқалам шеберлері өз туындыларына Қазақстан мен Польша арасындағы достықты, ұлттық өнер мен мәдениетті, әсем табиғатты, сирек кездесетін түз тағыларын арқау еткен. «Байқау өткен жылдың желтоқсанында басталған болатын. Қазақ халқының тарихи жәдігерлерін, ұлттық құндылықтарын дәріптейтін дүниелерді кестелі қағазға бейнелеген оқушылардың бірқатар шығармалары Краков қалалық кітапханасына қойылды», дейді «Коперник» поляк мәдени орталығы төрағасының орынбасары Валентина Корнева. Байқау қорытындысында 2 гран-при, 54 лауреат иелерінің есімдері белгілі болды. Гран-придің бірін петропавлдық жас талант Ульяна Борисова жеңіп алды. Жүлдегерлерді Польшаның Қазақстан Республикасындағы елшілігінің екінші хатшысы Юстына Скшидло табыс етті. Сондай-ақ, көрмеге арнайы қатысуға келген польшалық жас өнерпаздар қаланың көрікті жерлерін тамашалады. Өмір Есқали. Дерек, сурет: Солтүстік Қазақстан облыстық мәдениет басқармасының баспасөз қызметі.