ҚҰРҒАҚШЫЛЫҚ ҚЫСЫП БАРАДЫ

Биыл Ақжайық алқабындағы астық өсірушілердің қабақтары са­лыңқы, иықтары түсіңкі. Мұның бас­ты себебі, Еділ мен Жайықтың ара­лығындағы ұшы-қиырсыз кең жа­зықты түгел жайлаған жойқын құр­ғақшылық. Мұнда жаңа техно­ло­гияларды енгізу мен егістік мә­дениетін көтеру жөнінде атқарыл­ған шаралар айтарлықтай. Осы мақсатта соңғы жылдары облыстық бюджеттен бір миллиард екі жүз миллион теңге қаражат бөлінген. Алайда, негізінен тәлімі жер жағ­дайына негізделген өңірдің та­биғи-климаттық ерекшелігі бірінші мамыр мен он бесінші шілденің аралығында жалыны жер шарпыған аптап ыстықтың мызғымай тұрып алуы есіл еңбек пен жұмсалған қаражатты еш кетіргендей түрі бар. Батыс Қазақстан облыстық гид­ро­метеорология орталығының ха­бар­лауына қарағанда, осы уақыт­тың ішінде ауаның орташа тем­пе­ратурасы 35-40 градус ыстықты көр­сеткен. Сонымен бірге топы­рақ­тың қызуы 65 градусқа дейін жеткен. Сөйтіп, ылғалдың мүлдем же­тіспеуі бүгінгі күні аймақта се­біл­ген барлық дәнді дақылдар егіс­ті­гінің алпыс пайызға жуығы күйіп ке­туіне әкеліп соқтырды. Он бесінші шілдеге дейін об­лыс­та астық өсірушілердің құрғақ­шы­лық зардабынан тартқан шы­ғы­ны бір миллиард жеті жүз мың тең­гені құрайды. Дәл осындай күр­делі жағдай өткен жылы да ор­ын алды. Осы өткен жылдың шы­ғыны қазір аймақтағы ауыл ша­руашылығы та­уарын өндірушілерге “ҚазАгро” ұлт­тық холдингінен алған несиелері мен лизингтік төлемдерін уақытын­да қайтаруына мүмкіндік бермей отыр. Оның мөл­шері бір миллиард 936 мил­ли­он теңге төңірегінде. Оның үстіне республика көле­мін­де қызмет жасайтын міндетті сақ­тандыру компаниялары белгі­лен­ген заңдылықтар мен ережелер­ді белден басып, астық өсіруші­лер­мен келісім жасаудан бойларын ау­лақ салған. Ең бір қынжыларлық мәселе, биыл аталмыш компания­лар­дың Батыс Қазақстандағы бө­лім­шелері мен филиалдары жабы­лып қалған. Жығылғанға жұдырық деген осы да. Орал өңіріндегі төтенше жағ­дай­мен парапар биылғы төтен құр­ғақшылық осы өңірмен бір ендікте қоныстанған Ресейдің Еділ өзені бой­ындағы Саратов, Самара губер­нияларын, Жайықтың жоғарғы ағысындағы Орынбор облысын, Татарстан мен Башқұртстанды түгел жайлағанын да айта кеткенді жөн көреміз. Қазақстанмен көршілес Ресей­дің аталған аймақтарына федерал­дық бюджеттен қомақты қаражат бө­лініп жатқаны да батысқазақ­стан­дықтарға белгілі болып отыр. Сондықтан да олар республика Үкі­меті бұл мәселеге түсіністікпен қарап, тиісті қолдау көрсетеді деп санайды. Темір ҚҰСАЙЫН, Батыс Қазақстан облысы.