Испанияда шетелдікті бүйрегін сатуға күштеп көндірген топ қолға түсті

АСТАНА. 19 мамыр. Испанияда келімсектен оның бүйрегін сатып алмақ болған 5 адам тұтқындалды. Күдіктілер бұл сауда үшін шетелдікке 6 мың еуро төлеуге келіскен. Бұл туралы Yahoo News-ге сілтеме жасап, lenta.ru хабарлады. Полицейлердің айтуынша, бүйрек – тонаумен айналысатын жергілікті қылмыстық топтың басшысына қажет болған. Ол аталған адам мүшесін зәр шығару жүйесі бұзылған ұлы үшін сатып алғысы келген. «Медициналық тексеріс кезінде келімсек бұл келісімнен бас тартуға тырысады. Алайда, қылмыстық топ оны ұрлап әкетіп, ұрып-соққан. Тіпті келіспесе өлтіруден де тайынбайтындарын ескерткен», – дейді Испания полицейлері. Олар бұл істі Германия және Бельгия сақшыларымен бірлесіп тергегенін айтты. Айта кетейік, Еуропалық одаққа мүше елдер 14 наурызда адам мүшелерін сатуға қарсы халықаралық келісімшартқа қол қойды. Еуропалық кеңестің мәлімдеуінше, жыл сайын осындай «кәсіптен» сатушылар 1,2 млрд. доллар көлемінде табыс табады екен. Еламан Қоңыр. Дерек, сурет: lenta.ru.