Велоспорт. «Вуэльта» көпкүндігінің 1-кезеңінде Astana 13-орыннан көрінді

АСТАНА. 23 тамыз. Кеше велоспорттан Вуэльта көпкүндігі басталды. Испанияда өтіп жатқан сайыстың алғашқы кезеңінде қатысушылар командалық сында шеберлік байқасты. Бұл туралы egemen.kz хабарлады. Додада ел намысын қорғайтын Astana pro team кәсіби велокомандасы бірінші кезеңді 13-орынмен аяқтады. Алайда, бұл нәтиже велоспортшылардың жеке көрсеткіштеріне әсер етпейтіні белгілі. Сондықтан нағыз тартыс бүгін басталады деуге толық негіз бар. Екінші кезеңде атлеттер Алаурин-де-ла-Торре мен Каминито-дель-Рей елдімекендерінің арасын жалғаған 158,7 шақырымдық жарыс жолын жүріп өтеді. Бірінші кезеңдегі командалық сында қатысушылар 7,4 шақырымға созылған Пуэрто Банусу мен Марбельи арасындағы жолды басып өтті. Нәтижесінде BMC велокомандасы топ жарды (8 минут 10 секунд). Дәл осындай көрсеткішке ие Tinkoff-Saxo және Orica-Green Edge командалары тиісінше екінші, үшінші орындарға жайғасты. Ал 13-орыннан көрінген Astana жеңімпаздан 30 секундқа қалып қойды. Осы сайыста біздің команданың сапында Винченцо Нибали, Фабио Ару және Микель Ланда сынды мықтылар бар екенін ерекше атап өткен жөн. Сондықтан жалпы есепте топ жаруға толық мүмкіндік бар. Жарыс 13 қыркүйекте аяқталады. Еламан Қоңыр. Дерек: egemen.kz. Сурет: sport-xl.org.