Футбол. «Астана» Чемпиондар лигасының топтық кезеңіне шықты (видео)

АСТАНА. 27 тамыз. Бүгін «Астана» УЕФА Чемпиондар лигасы іріктеу турнирінің плей-офф бәсекесі шеңберінде қарымта кездесуін өткізді. Сырт алаңда Кипрдің АПОЕЛ командасымен болған ойын 1:1 есебімен тең аяқталды. Апта бұрын ойналған Астанадағы алғашқы ойында елордалықтар 1:0 есебімен жеңіске жеткен болатын. Екі матчтың қорытындысы бойынша «Астана» Чемпиондар лигасының топтық кезеңіне жолдама алды. Мұндай нәтиже Қазақстан футболының тарихында тұңғыш рет тіркеліп отыр. Бұл туралы egemen.kz хабарлады. Никосиядағы кездесу толығымен алаң иелерінің басымдығымен өтті. Бірінші таймда бірнеше рет қауіпті шабуылдар ұйымдастырғанымен АПОЕЛ ойыншылары есеп ашатын мүмкіндіктерді мүлт жіберді. Ал «Астана» қарымта шабуылдарға ғана иек артып, негізінен қорғаныста көп күш жұмсады. Екінші тайм тағы да апоелдіктердің басымдығымен басталды. Толассыз шабуылдардың арқасында алаң иелері 60-минутта есеп ашты. Айып соққысын өте сәтті орындаған Семир Штилич тамаша голдың авторы атанды. Гол салғаннан кейін АПОЕЛ-дің қарқыны күшейіп, шабуылдауды үдете түсті. Ойындағы өзгерістерді ескерген «Астананың» бас жаттықтырушысы Станимир Стойлов 68-минутта алғашқы қадамын жасап, Таңат Нөсербаевтың орнына Жуниор Кабананганы шығарды. Айқастың 84-минутында біздің команда дегеніне жетіп, таразы басын теңестірді. Кезекті қарымта шабуылдардың бірінде Бауыржан Жолшиев қапталдан айып алаңына пас шығарды. Әріптесі асырған допты сәтті пайдаланған Неманья Максимович Қазақстан футболы тарихындағы ең маңызды голдардың бірін соқты. Себебі, ойын соңына дейін есеп өзгеріссіз қалып, Максимовичтің добы «Астананы» турнирдің топтық кезеңіне алып шықты. Матчтағы кейбір статистикалық көрсеткіштерге назар аударайық. Қақпаға бағытталған соққы жөнінен АПОЕЛ алда болды (10 – 8). Оның ішінде тура жасалған соққылар – 6 – 6. Ал допқа иелік ету көрсеткіші бойынша алаң иелері айтарлықтай басымдық танытты (66% – 34%). Ойын барысында «Астананың» қақпашысы Ненад Эричтің белсенді болғанын ерекше атап өткен жөн. Сондай-ақ, Бауыржан Жолшиев пен Георгий Жуков та шеберліктерімен көзге түсті. УЕФА Чемпиондар лигасы. Іріктеу турнирінің плей-офф бәсекесі. АПОЕЛ (Никосия, Кипр) – «Астана» (Астана, Қазақстан) 1:1 (0:0), 0:1 26 тамыз. Никосия. ГСП стадионы. 23 000 көрермен. Төрешілер: Мартин Аткинсон, Стивен Чайлд, Стюарт Бард (бәрі де – Англия). АПОЕЛ: Бой Ватерман, Мариу Сержиу, Иньяки Астис, Мариос Антониадес (Матеуш Пентковский 86), Карлау (Жоао Гильерме 83), Семир Штилич, Константинос Макридис (Константинос Хараламбидес 55), Нуну Мораиш, Томас Себастьян Де Винсенти, Луис Леал, Вандер. «Астана»: Ненад Эрич, Марин Аничич, Бранко Илич, Евгений Постников, Дмитрий Шомко, Рохер Каньяс, Фокси Кетевоама (Алексей Щеткин 90+3), Неманья Максимович, Таңат Нөсербаев (Жуниор Кабананга 68), Георгий Жуков (Абзал Бейсебеков 89), Бауыржан Жолшиев. Голдар: Семир Штилич 60 – Неманья Максимович 84. Ескертулер: Томас Себастьян Де Винсенти 32, Константинос Хараламбидес 61, Вандер 88 – Бранко Илич 37, Дмитрий Шомко 63, Рохер Каньяс 71, Марин Аничич 87. Еламан Қоңыр. Дерек: egemen.kz. Сурет: footboom.kz.