Румыния Қазақстан бастамаларын қолдайды

Қазақстан Республикасы Парламенті Сенаты Консти­туциялық заңнама, сот жүйесі және құқық қорғау органдары комитетінің төрағасы Серік Ақылбай, Сенаттың Әлеуметтік-мәдени даму және ғылым коми­­­­тетінің мүшесі Серік Бектұрғанов және Парламент Мәжілісі Экономикалық реформа және өңірлік даму комитетінің мүшесі Төлеш Кенжин құрамына енген қазақстандық парламенттік делегация Бухарестке барып қайтты. Парламент депутаттары екі мемлекеттің парламентаралық ынтымақтастығын дамыту аясында біздің еліміздің Конституциясы мен Қазақстан халқы Ассам­блеясының 20 жылдығына орай Қазақстан елшілігі мен Румыния Парламенті және Халықара­лық қатынастар және экономика­лық ынтымақтастық институтымен бірлесіп ұйымдастыр­­ған «Парламенттің демократия­да­ғы рөлі. Қазақстан халқы Ассам­блеясының үлгісі – бірлік пен ұлтаралық татуластықтың құ­рылуы» атты ғылыми-тәжірибелік конференцияға қатысты. Конференцияда Румыния Парламенті Сенаты Төрағасының орынбасары, Энергетика мәсе­лелері жөніндегі комитет төр­ағасы Флорин Константинеску, Сенаттың шетелдегі румын диаспорасы мәселелері жөніндегі төрағасы Марчел-Думитру Бужор, «Румыния-Қазақстан» бірлескен парламенттік тобының басшысы, Депутаттар палатасының мүшесі Костел Алексе, сондай-ақ, саясаткерлер, мемлекеттік органдар, дипломатиялық корпус, ғалымдар мен іскер топтардың өкілдері қатысты. Қазақстан Парламентінің мү­шелері румыниялық әріптестері мен қалың көпшілікті еліміздің құқық институттары құрылуы мен Ата Заңымыздың тарихы, Қазақстан халқы Ассамблеясының қызметі, ұлтаралық және дінаралық үнқатысуды өрістетудегі халық­аралық бастамалар, оның ішінде Әлемдік және дәстүрлі діндер көшбасшыларының съезі жайында хабардар етті. С.Ақылбай құқықтық және демократиялық мемле­кет құрудағы еліміз Конс­ти­туциясының басты рөлі мен ұлт­аралық ынты­мақтастық саласындағы Қазақстан халқы Ассамблеясының ерекше орнын айта келіп, «Қазақстан-2050» Стратегиясы мен Президент Н.Ә.Назарбаевтың «Нұрлы Жол» Жолдауының негізгі бағыттары мен еліміздің келешек даму басымдықтарына тоқталды. Өз кезегінде Румыния Пар­­­ламентінің мүшелері Қазақ­стан­дағы демократиялық және құқықтық қоғам қалыптасуына жоғары баға берді. Д.Бужор ұлт­аралық келісімнің қазақстандық моделін және Қазақстан халқы Ассамблеясының негізгі рөлін атап өтіп, Қазақстандағы румын қауымының өзіндік ерекшелігін сақтаудағы мемлекет қолдауына ризашылығын білдірді. Сөз алған Ф.Константинеску аз ұлт­тар мен түрлі конфессиялар өкіл­дері бейбіт қатар өмір сү­ретін Қазақстанда дана және үйлесімді саясат жүргізіліп келе жатқанын атап өтті. Румыния Қазақстан Президентінің барлық халықаралық бастамаларын қолдайтыны айтылды. Сонымен қатар, қазақстандық парламентшілер Румыния Пар­ламенті Сенатының басшы­лы­ғымен, «Румыния-Қазақстан» парламенттік тобының депутаттарымен және комитет басшыларымен екіжақты кездесулер өткізді. Сондай-ақ, Румыния диаспорасы істері жөніндегі министрі Анджел Тилвэрмен және Румыния Сыртқы істер министрлігінің Мемлекеттік хатшысы Даниел Ионицамен кездесулер болды, деп хабарлады Қазақстан Республикасы Парламенті Сенатының баспасөз қызметі.