Ташкентте қазіргі заманғы жапон фильмдерінің күндері өтеді

АСТАНА. 11 наурыз. Өзбекстан астанасы – Ташкент қаласында 13-15 наурыз аралығында қазіргі заманғы жапон фильмдерінің күндері өтеді. Үстіміздегі жылғы шара бұл елде осымен 10-шы мәрте өткізілгелі отыр. Бұл туралы anhor.uz сайты хабарлады. Бағдарламада бес көркем және бір анимациялық фильм бар. Олар отбасылық бақыт, уақытқа фантастикалық саяхат жасау, адам мен иттің арасындағы шынайы да терең достық сезімі, кездейсоқ махаббаттың машақаттары туралы, сондай-ақ Хоккайдо аралындағы табиғаттың керемет сұлулығы жайлы сыр шертеді. Қазіргі заманғы жапон фильмдерінің Ташкенттегі күндерін Жапонияның Өзбекстандағы елшілігі «Өзбеккино» агенттігінің ықпал етуімен ұйымдастырып отыр. Салтанаттың ашылу рәсімі 13 наурыз күні сағат 18:00-де Кино үйінің үлкен залында басталады. Оған Жапонияның Өзбекстандағы төтенше және уәкілетті елшісі Като Фумихико қатысады. Бірінші көрсетілімге режиссер Синобу Ягутидің «Сәтті ұшу сапары» деген комедиясы ұсынылады. Ол авиацияның әдетте жолаушыларға беймәлім болып келетін жақтарын көрсетуге арналған. Фильмнің оқиғасы аэропорттан басталып, ұшақтың бортында жалғасады. Мұрат Айтқожа.