Мәскеуде еден жуушы банктен миллион рубль ұрлады

АСТАНА. 11 наурыз. Мәскеу қаласындағы банк бөлімшелерінің бірінде еден жуушы болып жұмыс істейтін Қырғызстаннан келген 35 жастағы Миргули Турганбаеваға қарсы қылмыстық іс қозғалды. Бұл туралы vesti.ru хабарлады. Тергеу жұмыстарының дерегі бойынша, М.Турганбаева касса залын 29 қаңтар күні кешке жинастырған. Үстелдің астынан бір бума рубль банкноттарын тауып алып, оны банк қызметкерлеріне берудің орнына қоқыс тастайтын қапшыққа салып алып шыққан. Жұмыстан кейін жалдамалы пәтеріне оралған ол ақшаны тығып, кейіннен бөліп-бөліп Қырғызстандағы туыстарының шотына аударып отырған көрінеді. М.Турганбаева күдік тудырмау үшін жұмысына баруды тоқтатпаған. Алайда, ақшаның жетіспейтінін білген банк қызметкерлері бейнебақылау камераларының жазбасын мұқият қарап, күдіктінің түр-тұлғасын анықтаған. Полиция қызметкерлері М.Турганбаеваның жалдамалы пәтерін тінту кезінде 420 мың рубльдің аударма қағаздары мен қалған 580 мың рубльді тапты. Айдар Өрісбаев. Дерек: vesti.ru. Сурет: rg.ru.