Жұртшылық “Бауыржан” қоғамдық қайырымдылық қорының директоры Жұлдыз Омарбекованы ұлттық қоғамдық “Алтын жүрек” сыйлығының ұйымдастырушысы ретінде таниды. Жұлдыздың айтуынша, 4 жыл ішінде күз мезгілінде өтетін кең ауқымды жобада көптеген өзгерістер мен толықтырулар орын алып отырады.
– “Бауыржан” қоры “Алтын жүрек” сыйлығын жасауға қалай әсер етті?
– “Бауыржан” қайырымдылық қоры өз уақыты ішінде Қазақстандағы әлеуметтік институтты қалыптастыру мен қайырымдылықты дамытуда көптеген игі істер атқарып үлгергендігін мақтанышпен айта аламын. Осы қордың негізінде “Алтын жүрек” сыйлығы дүниеге келді. Бүгінгі күні “Бауыржан” және “Алтын жүрек” – бірін-бірі толықтыратын бір бүтін болды десек болады.
– Жұлдыз, сіз тек әлеуметтік қызметкер ғана емес, шығармашылықпен де айналысады екенсіз...
– Менің басыма қандай да бір ой келсе, сол ойымды жүзеге асырмайынша ұйқыны да, тамақты да ұмытамын. Мысалға жақын уақытта “Қайырымдылық қор басқарушыларына арналған нұсқаулық” атты кітап шығаруды ұйғарып отырмыз. Сондай-ақ, “Бауыржан” қоры 2010 жылдың қазан айында мүмкіндігі шектеулі жандарға арналған “Самғау” атты жаңа сыйлықты дүниеге әкелу жоспары бар. Жаңа жоба 1 қазаннан бастау алады, ал салтанатты марапаттау кеші 3 желтоқсан күні – халықаралық мүмкіндігі шектеулі жандар күніне орай ұйымдастырылады.
– “Алтын жүрек” өміріңіздің маңызды жобасы деп ойлайсыз ба?
– Иә. Жақында бір компания өкілі “Алтын жүрек” сыйлығына демеушілік көрсететінін айтты, алайда сол көмегі үшін “Жыл ұйымы” номинациясы бойынша жеңімпаз болуын талап етті. Біраз ашуымды тудырғаны рас. Ол болса маған, бұл жай ғана жоба екендігін айтты. Мен оған бұл жай ғана жоба емес, “Алтын жүрек” менің өсіріп, аяққа тұрғызған балам сынды екенін түсіндіруге тырыстым. Жоба мен үшін ақшадан да, атақтан да қымбат. Сыйлық халыққа керек және оның маңыздылығы жыл сайын артып келеді. Қазіргі таңда “ақша әлемді билейді” дегенді мойындауға қиналамын. Сондықтан да осы аталмыш сыйлық әділетті болғандығын мақсат тұттым және ұйымдастыру барысы ашық болғанын қаладым. Бізде бәрі де ашық дауыспен анықталады.
– Сіз алдыңғы жолы берген сұхбатыңызда жыл сайын жобаға жаңа өзгерістер енгізуге тырысамын деп едіңіз, осы жылы қатысушыларды немен қуантасыз?
– Жыл сайын ұйымдастыру комитеті сыйлықты жаңартып отырады, жұмыстың механизмін өзгертуге тырысады. Бастапқы кезде үміткерлерді таңдауда, қажетті құжаттарды дұрыс реттестіруде, марапаттау салтанатын ойдағыдай өткізудің механизмдерін толықтай білмейтінбіз. Жыл сайын өзгерістер енгізе бастадық. Мәселен, жаңа бағалау жүйесін енгіздік, онда сарапшы және қоғамдық кеңес лауреаттар мен қатысушыларды 10 балдық жүйемен бағалайды. Таңдаудың ережесі мен шарттарын да қайта қарастырдық. Қазір меценаттар мен қайырымдылықпен айналысатын мекемелер ағымдағы жылдағы қайырымдылықтарын дәлелдейтін құжаттарды ғана тапсыра алады. Сонымен бірге төрелік ету мен жеңімпазды таңдауға ұйымдастыру комитеті өкілдері қатысады.
– Шарттар өзгерген сайын қатысуға ниеттілердің саны азаймай ма?
– Азаймады, өтініштерді қабылдау әлі жүріп жатыр. Қатысуға ниет білдірген меценаттар саны жыл сайын өсіп келеді. Мысалы, өткен жылмен салыстырғанда, жалпы саны екі есеге өскен. Таңдау талаптары өзгергендігі, менің ойымша – дұрыс, өйткені барлық қатысушыларға бірдей құқық беріледі. Бәрі әділетті болады.
– Биыл сарапшы және қоғамдық кеңестің құрамында кімдер болмақ?
– Қазылар алқасының мүшелерін белгілеп қойдық. Енді оларды арнайы шақырумен айналысып жатырмыз. Алайда олардың есімін әзір айта алмаймыз.
– Кең ауқымды жоба жасауға не көмектесті?
– Кімде-кім қандай да бір жоба жасауға бел буса, ең алдымен бар ынтасы мен жігерін аямауы керек. Әрбір жоба балаң сияқты. Мәселен, балаңа көңіл бөлмей қалсаң, тәрбиесінде олқылық болады ғой. Жоба да көп көңіл бөлмесең, еңбек етпесең дами алмайды. Мен бұл жобаны жақсы көретініме қуанамын және осы қуанышым мен махаббатымды ұйымдастырушылар да бөлісетініне ризамын. Биыл, міне, төртінші жыл “Алтын жүрек” сыйлығын өткіземіз. Алғашқы жылы күні-түні тынымсыз еңбек еткеніміз есімде. Кеңседе таңғы төртке дейін отырып жұмыс жасаған кездеріміз болды. Міне, қазір соның жемісін көрудеміз, жоба жыл сайын жаңа табыстарға жетіп келеді.
Сондай-ақ, бізгеқол ұшын берген “Chevron”, “Саутс-Ойл”, “KAZENERGY”, “КТЖ” компанияларын айтпай өту мүмкін емес. Биылғы жылы салтанатты марапаттау әсем Астанамыздағы Конгресс-холда өтеді. Бұл кештің өтуіне Президент Әкімшілігі, Байланыс және ақпарат министрлігі, Мәдениет министрлігі, сондай-ақ Астана қаласының әкімдігі ұйытқы болмақ.
– “Алтын жүрек” сыйлығымен салтанатты марапаттау кеші туралы айтып өтсеңіз...
– Кеш жарқын әрі қызық болған сайын, көрермендер есінде ұзақ сақталады. Конгресс-холда өтетін кеште барлығы лауреат атанады деп айта алмаймын, алайда бұл кеш қызықты әрі әсерлі болатынына сөз берем. “Алтын жүрек” қатысушылары мен қонақтарын ұмытылмастай кеш күтеді. Бірінші рет “Алтын жүрек” гимні шырқалады, сөзі мен әуені Ренат Гайсиндікі. Біз жыл сайын жоба өсіп, жаңа жетістікке, шыңдарға шыға береді деп сенеміз. Сондай-ақ, “Алтын жүрек” сыйлығының алдағы уақытта халықаралық деңгейге жеткенін, халықаралық сыйлыққа айналғанын армандаймын.
– Әңгімеңізге рахмет.
Әңгімелескен Венера ТҮГЕЛБАЙ.