Бұл – лайықты таңданыс

Мемлекет басшысы Нұрсұлтан Назарбаев белгілі британиялық жазушы және мемлекет қайраткері, “Нұрсұлтан Назарбаев және Қазақстанның құрылуы” атты кітаптың авторы Джонатан Айткенді қабылдады, деп хабарлады Қазақстан Республикасы Президентінің баспасөз қызметі. Кездесу барысында Д.Айткен Президентті Қазақстан жайлы жаңа кітап жазатыны туралы өз жоспарынан хабардар етті. “Хабар” телеарнасына берген эксклюзивті сұхбатында танымал ағылшын жазушысы және биографы тәуелсіз Қазақстанның жетістіктеріне жоғары баға берді. – Менің Қазақстан туралы жеке әсерім – тамаша! Бұдан 20 жыл бұрын сіздердің республика туралы әлемде ешкім білген жоқ. Ал, бүгінде Қазақстанның табы­сы туралы барлық халықаралық қоғамдастық айтуда. Нұрсұлтан Назарбаев Қазақстанды көшбас­шы ел жасады. Және бұл лайық­ты таңданыс, – деп атап өтті Д.Айткен. Джонатан Айткен – Бри­та­ния үкіметінің және парла­менті­нің бұрынғы мүшесі. Үлкен саясаттан кеткеннен кейін ол әлем­дік тарихтағы белгілі тұлға­лар­дың өмірбаянын зерттеумен айналыс­ты. Ол – 12 кітаптың ав­торы. Бұл кітаптар Ричард Ник­сон, Джон Ньютон, Чарльз Кол­сон туралы болса, ал енді солар­дың ішінде Нұрсұлтан Назарбаев та бар. Мен әлемдік тарихта Нұр­сұлтан Назарбаев Ұлыбритания тарихындағы Черчилльден кем рөл ойнамайды деп ойлаймын. Қа­зақстан Президенті қуатты ядролық арсеналдан өз еркімен бас тартқанда-ақ әлемдік саясат­керге айналған болатын. Маған Вашингтондағы ядролық қауіп­сіз­дік жөніндегі жаһандық сам­митте Нұрсұлтан Назарбаевты қандай­лық сый-құрметпен қарсы алға­нын бақылаудың сәті түсті, – деді өз сөзінде британиялық жазушы.