Баспасөз-2011
Өз оқырманына адалдығын ЕҚЫҰ Саммиті күндерінде бүкіл қызметімен дәлелдеп берген «Егемен Қазақстан» газетіне де оқырманның адалдығы алдымен қажет екені белгілі. Сол қажеттіліктің көрінер сәті баспасөзге жазылу болса керек. Өзіңнің «Егемен Қазақстаныңа» 2011 жылға жазылудың аяқталуына бір апта ғана қалды, құрметті оқырман.
Қазақстан кемелдігінің жаршысы
Теміржан ХАМИТОВ, Еңбекшілдер ауданының әкімі.
Біржан елі – Еңбекшілдер ауданының бас газетіміз «Егемен Қазақстанмен» ұзақ жылғы байланысы ынтымақты әрі әріптестік қарым-қатынасқа ұласты. Жыл басындағы Президент Жолдауынан репортаж Аңғал батыр ауылы тұрғындарының теледидар алдындағы ұжымдық тамашалауынан жазылған еді. Біздің жыл бойғы жетістіктеріміз бен заман екпініндегі ұмтылыстарымыз абыройлы газетімізде үзбей көрініс тауып, қайратымызды еселей түсуде.
Өз басыма «Егемен Қазақстан» газетінің шығармашылық ұжымы астаналық Ақмола облысының тыныс-тіршілігіне қатысты салиқалы ой қозғайтыны ұнайды. Елбасы Нұрсұлтан Назарбаевтың Астананың азық-түлік белдеуін қамтамасыз ету, Астанамен серіктес ауылдарды дамыту, Бурабайды әлемдік деңгейдегі туристік орталыққа айналдыру, Астананы жасыл желекпен көмкеру туралы тапсырмалары Ақмола облысына жүктелген зор жауапкершілік. Оған облыс тұрғындарымен қатар, біздің аудан да елеулі үлес қосып жатқанын еліміздің түкпір-түкпіріндегі оқырмандар газет жарияланымдары арқылы жақсы біледі деп ойлаймын.
Сіздер Еуропадағы қауіпсіздік және ынтымақтастық ұйымының төрағасы болып отырған Қазақстанымыздың 11 жыл үзілістен кейін Астана Саммитін жоғары деңгейде өткізгенін бастан-аяқ тәптіштеп жазумен қатар, әлем көз тіккен басқосудың, ол қабылдаған декларацияның маңызын ашып көрсетуде жанқияр еңбек танытып жатырсыздар. Газет бұл орайда күнделікті жұмыс кітабымызға айналады. Сондай-ақ, әр айдың соңғы сәрсенбісінде шығатын «Етжеңді Егемен» нөмірлері тарихымыздан, тіліміз бен ділімізден, ұлттық таным-тәрбиемізден ұлағат төгетінін айтқым келеді. Осы орайда, біздің өңірлерімізден де рухымызды көтерер мақалалар жарияланып тұрғанын қалар едік.
Баспасөзге жазылу Қазақстан кемелдігінің бір көрінісі іспетті. Сондықтан, саяси науқанды ауданымызда жыл сайын үлкен ұйымшылдықпен өткізу дәстүрі қалыптасқан. Біз республикалық бас басылым – «Егемен Қазақстан» газетіне жазылу жөніндегі межеге облыста бірінші болып қол жеткіздік.
Ақмола облысы.
Жеделхат
«Егемен Қазақстан» республикалық газеті АҚ президенті
Сауытбек АБДРАХМАНОВҚА
Қызылжар өңірінің тұрғындары «Егемен Қазақстанға» жерлестеріміз Смағұл Сәдуақасов пен Ғабит Мүсіреповтің басшылық еткенін мақтан тұтады. Әркез ұлттық, мемлекеттік мүддені бірінші орынға қойып, ауыл адамдарының мұң-мұқтажына, ұсыныс-тілектеріне үлкен сергектікпен қарайтын басылымның оқырманы болу – бәріміз үшін үлкен мәртебе. Жергілікті тұрғындардың аз қоныстанғанына қарамастан, облыста «еліміздің бас басылымына» жазылушылар санының әлдеқайда артуы осы ойымызды айғақтаса керек. Облыс әкімі Серік Біләловтің бағыты анық, ойы салмақты, пікірі нық басылымды 7000 данаға дейін тарату мақсаты алынар асу екеніне қазірдің өзінде көзіміз анық жетті. Қызылжар ауданында да заманмен үндес заңғар басылымды жаздырып алушылар қатары көбейіп келеді. Іссапар барысында өзіңіз болып, тыныс-тіршілігімен танысқан жаңа елді мекен Бәйтерек ауылының тұрғындары — шетелдерден атажұртқа оралған бауырлармыз үшін де «Егеменнің» орны бөлек екенін баспасөзге жазылу науқаны анық аңғартып отыр Қайрат ПІШЕНБАЕВ, Қызылжар ауданының әкімі. Солтүстік Қазақстан облысы. *** «Қай елдің баспасөзі мықты болса, сол елдің келешегі зор», деп алаш ардақтысы М.Дулатов айтқандай, халықтың жүрегі, тілі һәм құлағы бола білген қазақ баспасөзінің қарашаңырағы «Егемен Қазақстан» – тұғыры биік басылым. Басылымның бәрінен де ұлт мүддесін жоғары қойып, Елбасы саясатын үлкендігі-кішіге үндеп, қазақстандықтарды қажырлылыққа, бірлікке шақырудағы, әлеумет көкейіндегіні дөп басып, бүгінгі жаңарып өркендеуіміздің, ұлттық ұлылығымыздың, егемен елдігіміздің идеологиялық тұғырнамасының шыңында тұрып, кемел келешек жолына бастаудағы рөлі орасан зор. Елбасының айрықша қамқорлығындағы ауданға айналып, ұлтаны құрғаған теңізі қайта толған, армандары ақиқатқа айналып, құт дарып, қыдыр қонған Аралда аталмыш басылымның өзіндік орны ерекше. Қайта жандану кезеңіндегі бүгінгі Аралдың тыныс-тіршілігі жайлы толымды мақалалар жариялап келе жатқан егемендіктерге алғысымыз шексіз. Бүгінгі күнге Арал ауданы тұрғындары «Егемен Қазақстанның» 1800 данасына жазылғандығын хабарлай отырып, басылымның шығармашылық ұжымына сәттілік тілеймін. Нәжімәдин МҰСАБАЕВ, Арал ауданының әкімі. Қызылорда облысы. *** «Егемен Қазақстан» – тәуелсіздік тірегі, ел айнасы. Бұл газетте саясат, экономика, мәдениет, әдебиет, тарих, спорт, дәстүр, басқа да барлық тақырыптар жан-жақты қамтылады. «Егемен Қазақстанның» қай тақырыпты да, қай мәселені де терең зерделеп, зерттеп жазатыны қызықтырады. Үлкен маңызды шаралар болғанда, ертеңгісін таңертең сол жаңалық газет бетінде тұрады. Осының бәрі газет ұжымының кәсіби шеберлігінің нәтижесі деп білеміз. Өзіңіз қазан айында біздің оқу орнында болып, жақсы кездесу өткіздіңіз. Газет басшысының біздің оқу орнына келгеніне біздер де өте қуаныштымыз. Еліміздің бас газетін мемлекеттік педагогикалық институт ұжымы студенттері мен ұстаздары алып оқиды. Сондықтан да біздің ұжым баспасөзге жазылудан, әсіресе, қазақ тілді басылымдарға жазылудан шет қалмайды. Баспасөзге жазылу науқаны аяқталғанша «Егемен Қазақстан» газетінің таралымы оқу орны бойынша 300 данаға жететін болады. Жанмырза НҰРМАҒАНБЕТОВ, мемлекеттік педагогикалық институт ректоры. Павлодар.
