Мәдениет үшін жасаған еңбек те, жұмсаған қаржы да қасиетті
– деді облыс әкімі Сергей Кулагин жаңа нысандарды қабылдау сәтінде
Қостанай қаласында күрделі жөндеуден өткізіліп, жаңартылған үш бірдей мәдениет нысандары бір күнде есігін айқара ашты. Соның алдыңғысы – Ы.Алтынсарин атындағы балалар мен жасөспірімдер кітапханасы. ХІХ ғасырдың архитектуралық ескерткіштеріне жататын бұл ғимарат – 1896 жылы салынған, көпес Воронцовтың үйі. Қазір қаладағы ірі мәдениет ошақтарының бірі. Ол орналасқан ғимарат негізгі және қосалқы екі бөліктен тұрады. Өткен жылы бюджеттен 100 миллион теңге бөлініп, негізгі ғимарат күрделі жөндеуден өткізілген болатын. Ал биыл республикалық және облыстық бюджеттен тағы да 182 миллион теңгеден аса қаржы бөлініп, ескі ғимараттың қалған бөлігі түгелдей қайта жаңартылды. Сырты қызыл кірпіштен бедерленіп салынған үйдің тарихи келбетіне ешқандай нұқсан келтірілместен, іші еурожөндеуден өтті. Сонымен қатар осы қаржыға кітапхана заманауи жабдықтармен де жабдықталды. Білім ошағының барлық залы компьютерлендірілді. – Кітапхана залдарында жас оқырмандарға да, кітапханашыларға да жақсы жағдай жасалған. Әр залда кітаппен қоса сол кітаптың электрондық нұсқасы да бар. Оқырман қайсысын қаласа соны пайдаланады,–дейді кітапхана директоры Татьяна Теплякова. Мұнан кейін облыс әкімі Сергей Кулагин бастаған топ облыстық мәдениет сарайына келді. Бұрын «Қазақстан темір жолы» Қостанай бөлімшесінің мәдениет сарайы болған бұл ғимарат қазір облыстың балансына қарайды. Мұнда облыстағы көркемөнерпаздардың басын қосатын «Юность» мәдениет сарайы орналасқан. 1964 жылы іргесі қаланған ғимараттың қай жылы күрделі жөндеуден өткенін қостанайлықтар біле қоймайды. Қабырғасы күйелеш болып тұратын бұл сарайға енді кірген кісі оны тани қоюы қиын. Іші мәдениет ордасына енді ұқсағандай! Ғимаратқа үстіміздегі жылы «Жол картасының» шапағатымен жөндеу жүргізілді. Оған республикалық бюджеттен 200 миллион теңгенің сыртында қаржы бөлінді. – Бұл – сіздерге уақытша жасалған жағдай. Алдағы жылы қазақ драма театрының жаңа ғимараты біткен соң, оның қазіргі үйі босайды. Оның Кеңес Одағы кезінде мәдениет сарайы үшін арнайы салынғанын да жақсы білесіздер, концерт залы да, сахнасы да кең. Алдағы жылы оған да қаржы тауып, осындай күрделі жөндеу жүргіземіз де, сіздерге тарту етеміз. Ал мына ғимаратты кішкентай көрермендерге сыйлаймыз, яғни мұнда қуыршақ театры орналасатын болады, – деді облыс әкімі. Жаңа жөнделген мәдениет сарайында би залы, әдістемелік кабинеттер, түрлі-түсті дыбыстық аппараттар қондыратын орындар, түрлі үйірмелер үшін кабинеттер ескерілген. Биыл облыс орталығындағы М.Горький атындағы орыс драма театры қайта жөнделіп, пайдалануға берілді. Салынғанына ғасырдан астам уақыт болған бұл ғимарат қайта жөнделіп қана қойған жоқ, оның архитектуралық жобасына өзгерістер де енгізілді. Енді театрда бір емес, екі көрермен залы бар. Жаздай, күздей тынымсыз жүргізілген жұмыстың арқасында театр тоғыз айдың ішінде көрермендерге қайта ұсынылды. Ал бүгінде облыс орталығынан қазақ драма театрының жаңа ғимараты салынып жатыр. Алдағы жылы пайдалануға берілетін бұл құрылысқа 2 миллиард теңге қаржы бөлінді. Жаңа жылға дейін оның іргесі толық қаланады да, алдағы жылдың аяғына дейін көрермен игілігіне берілмек. Нәзира ЖӘРІМБЕТОВА. Қостанай.
