Салтанатты қабылдау жасалды

15 желтоқсанда Мәскеу Мэриясында Ресейде тіркелген шетел дипломатиялық өкілдері басшылары үшін салтанатты қабылдау болды. Қазақстан Республикасының Ресей Федерациясындағы Төтенше және өкілетті елшісі Зауытбек Тұрсыбеков меймандарды Қазақстан-Ресей ынтымақтастығының қазіргі жағдайы мен перспективалары туралы хабардар етті, деп хабарлады ҚР-ның РФ-дағы елшілігінің баспасөз қызметі. Атап айтқанда, ол Мәскеу бас­шылығы мен қазақстандық кәсіпкерлердің көмегімен биыл­ғы жыл аясында өткізілген Мұ­ғалім жылына және Ұлы Же­ңіс­тің 65 жылдығына орай қазақ­стандық батырлар – Бауыржан Момышұлы мен Әлия Молда­ғұ­лова атындағы мектептерге жаң­ғырту жұмыстары жүргізілгенін және қазіргі заманғы оқу-тех­ни­калық құрал-жабдықтармен жа­рақ­тандырылғанын атап көрсетті. З.Тұрысбеков Мәскеу Мэриясына Ресей астанасында Ржевтағы 100-ші және 101-ші жеке ат­қыш­тар бригадасындағы қазақ­стан­дық жауынгерлерге арнал­ған Ме­мориалдық кешеннің ашылуына байланысты болған Жеңіс пойы­зына қатысушы­лар­дың кездесуін жоғары деңгейде ұйымдас­тыр­ғаны үшін алғысын білдірді. З.Тұрысбеков Мәскеу метро­сы­ның бір стансасына «Қазақ­стан», ал Алматы метросының бір стансасына «Мәскеу» атауын беру туралы екіжақты келіссөз барысы жайын хабарлады. Олар­ды 2011 жылы – Ресей мен Қа­зақ­стан тәуелсіздігінің 20 жыл­дығына орай ашу жоспарланып отыр. Қабылдау шеңберінде Зауыт­бек Тұрысбеков Мәскеу Мэрі Сергей Собянинмен кездесті. Қалабасы екіжақты сауда-эконо­микалық ынтымақтастықты те­рең­детуге, қазақстандық инвес­ти­цияларды Ресей астанасына қа­зіргіден де кеңірек тартуға және қазақстандық компаниялардың Мәскеу үкіметінің тендерлеріне қатысуын белсенді етуге ықы­ласты екенін танытты.