Кешенді спорт сарайы

Мұнда қысқы және жазғы спорттың бірнеше түрімен жаттығуға мүмкіндік бар

Былтыр жобалық құны 3 миллиард теңге болатын спорт сарайының жұртшылық игілігіне берілуінің арқасында бірқатар қадау мәселелер өз шешімін тапқаны жайлы облыстық денешынықтыру және спорт басқармасының басшысы Руслан ЕСЕНАЛИН әңгімелейді. – Руслан Бақыттыұлы, қара­саң көз сүйсінетін әрі қаланың шырайын аша түсетін кешенді нысанның іске қосылуы облыс өмі­­ріндегі айшықты оқиға екені талассыз. Оның ашылу сал­та­на­тын жұртшылық қалай қа­был­дады? – Дене күшін жетілдіріп, саламатты өмір салтын серік еткен жерлестеріміздің қатары өңі­рі­мізде жыл өткен сайын молайып келеді. Бүгінгі күні солтүс­тік­қазақ­стандықтардың 28,2 пайы­зы спортпен айналысады. Бұл – 160 мың адам қамтылды деген сөз. Оларға 2700-ге жуық спорт нысандары қызмет еткенімен, әлі де аздық қылатын. Әсіресе, гимнасшылар, ак­робатшылар, жеңіл атлетшілер, күштік жекпе-жек залдары, велотрек алаңдары жетіспейтін. Соның салдарынан басқа аймақтарда жат­тығуға мәжбүр болатын. Жабық мұз айдынының болмауы салдарынан хоккейшілер командасын құру елеулі қиындық тудырып келген. Аймақ басшысы Ерік Сұлта­новтың тікелей қолдауымен тұр­ғызылған сән-салтанаты ке­ліскен әмбебап ғимаратқа ересектермен қатар балалар да қатты қуанды. Спорт сарайының жобасы бойынша негізгі үш блок – жеңіл атлетикалық манеж, 1 мың жанкүйер тамашалай алатын жа­бық мұз айдыны және велошабандоздар мектебі орналасқан. Соған сәйкес шайбалы хоккей, коньки, шорт-трек, шағын футбол, волейбол, баскетбол, күш жекпе-жегі, таэквондо, дзюдо, бокс сияқты спорт түрлерімен әркім ер­кін шұғылдана алады. Ве­ло­ша­бандоздарға лайықталған екі трек алаңы, тренажер, көркем гимнас­тика, акробатика залдары жұмыс істейді. Әмбебап спорт залы 500 орынға шақталған. Балалар мен жасөспірімдерге арналған спорт мектептерінің жеңіл атлетшілері, гимнасшылары мен акробатшылары, хоккейшілері бұған дейін тар жерлерде қысылып-қымтырылып келсе, енді оларға да жан-жақты жағдай жасалған. – Лондон Олимпиадасының же­ңімпазы, атақты жерлесіміз Алек­­сандр Винокуровтың жолын қу­­­ған ізбасарлардың да жат­­­тығу мәселесі шешілген болар? – Иә, қыс айларында тынымсыз жаттығу жұмыстарын жүр­гізетін кең спорт залдарының бол­ғанына не жетсін! Бұдан кейін жас өрендердің велоспортқа қы­зы­ғушылығы артпа­ғанда қай­теді? Өңір велошабандоздары өткен маусымды тамаша же­тіс­тіктермен қорытындылады. Елі­міз­дің төр­тінші спартакиа­да­сында жалпы­командалық есеп бойынша же­ңістің ең биік тұғырына көтерілді. Алексей Луценко әлем жеңімпазы атанса, кәсіби вело­команданың сапында Руслан Тілеубаев, Арман Қа­мышев, Бах­тияр Қожатаев тамаша өнер көрсетіп жүр. «Астана» құрлық­тық командасының мүше­лері Жандос Бижігітов, Тілеген Май­дос, Виктор Окишев, Вадим Галеев халықаралық, респуб­лика­лық сайыстарда топ жарды. Азия ойындарының күміс жүлдегері Олег Земляков болаша­ғынан үлкен үміт күттіреді. Ве­лоспорт мектебі жұмыс істеген 17 жыл бедерінде 1 еңбек сіңірген спорт шебері, 5 ха­лықаралық дәрежедегі спорт шебері, 20-ға жуық Қазақстанның спорт шебері әзірленді. Жуырда елордалық «Astana Pro Team» велокомандасымен екі жыл келісімшарт жасасқан Бахтияр Қожатаевқа ха­лықаралық дәрежедегі спорт шебері куәлігі тапсырылды. Конькишілеріміз бен акро­бат­­шы-гимнасшы­ларымыздың ерен табыстары қалай ұлықтасақ та жа­расады. Оған халықаралық дәре­жедегі спорт шеберлері Роман Креч пен Дмитрий Бабенконың конь­кимен сырғанаудан ел ме­рейін өсіріп жүргендері дәлел. Роман Сочи Олимпиадасында 500 метр қашық­тықта 7-ші орынды иемденіп, ұлт­тық рекордты жаңартса, Гер­манияда әлем кубогының кезекті кезеңінің жеңімпазы болды. Олеся Колы­шева көркем гимнастикадан, Виталий Дель акробатикадан халық­­аралық додаларда жасындай жарқырап жүр. – Айтпақшы, жеңіл атлет­ші­­міз Ирина Эктова биылғы Олим­­пия ойындарына лицензия ұтып алған жоқ па? – Иә, Рио де Жанейро қала­сында өтетін байрақты бәсекеге қатысатыны бәріміз үшін зор қуа­­ныш. Ол Қазақстанның жас­тар біріншілігінде үш қарғып секіруден 14,32 метр нәтиже көр­сетіп, қарсыластарынан басым шық­ты. Мұның алдында атақты желаяқ Ғ.Қосановты еске алуға арналған халықаралық жарыста бірінші орынды жеңіп алған болатын. Жеңіл атлетшілер Маргарита Мұқашеваның, Ирина және Ев­гений Эктовтардың, велошабандоздар Алексей Луценконың, Ар­тем Захаровтың, Наталья Сай­фут­динованың, зілтемірші Айдар Қазовтың Олимпиадаға бару мүмкіндіктері мол. Сөз арасында солтүстік­қазақ­стандық спортшылардың 16 әлемдік, 15 азиялық, 48 халық­аралық, 154 елішілік жарыстарға қатысып, жалпы жиынтығы 530 медаль ұтып алғанын, олардың 194-і олимпиадалық спорт түрлеріне жататынын айта кеткен жөн. Ха­­лықаралық, республикалық бә­секелерде үздік көрсеткіштерге жетіп жүрген 90 спортшы облыс әкімі шәкіртақысының иегерлері. 6 жаттықтырушы мен спортшы пәтерлерге қол жеткізді. Бұрнағы жылға қарағанда спорт нысандары 374 бірлікке кө­бейіп, спорт алаңдарының тап­шылығы айтарлықтай азайды. Ша­­ғын футбол алаңдары мен хоккей корттары көптеп салынды. 3 спорт клубы құрылды. Солтүстік Қазақстан кәсіптік-тех­­ни­калық кол­леджі жанынан «спорт жөніндегі жаттықтырушы» бөлімі ашылып, 75 студент білім алады. Олардың 35-іне әкімнің шәкіртақысы төленеді. Биылғы жылы Новоникольское және Жа­ңа­­жол елді мекендерінде денешы­нықтыру-сауықтыру кешендері бой көтеретін болады. Кішкенекөл ауылында осы үлгідегі нысанның жобасы жасалды. – Ескі жылға өкпеміз жоқ, жа­ңа жылда көңіліміз тоқ болсын.  Әңгімелескен Өмір ЕСҚАЛИ, «Егемен Қазақстан». Солтүстік Қазақстан облысы.