Қамқорлықты халық сезініп отыр

Қаржылық дағдарыс Қазақ­станды ғана емес, бүкіл әлемді құрсауына алып, тамағынан буып тұр. Кеңшілік кезеңдегідей емес, қазір бүкіл Жер шарын мекендеген мемлекеттер бюджеттерін қайта қарап, кіріс көздерін іздеп, артық шығынның бәрін қысқартып, «көрпеңе қарай көсіл» қағидатына көшті. Олай етпесе болмайды. Ысырапшылдық, қаржыны оң-солға қарамай жұмсау дегеніңіз түбі тығырыққа әкеп тірейді. Қолда бар қаржыны үнемдеп жұмсаудан бөлек, жұмыс орындарын қысқартып, айлықтарына да өзгеріс енгізіп жатқан елдер көп. Бұл – адамдар жұмыссыз қалып, жұмысы барлардың өзі мардымды жалақы ала алмай отыр деген сөз. Күнделікті тіршілігі бір ғана жалақыға байланып отырған талай адам осылайша дағдарыстың қыспағын сезініп жатыр. Бұған дейінгі дағдарыстың өзінен дамуға жол тапқан Қазақстан бұл жолы да өзіндік соқпағын таба білді. Төрімізге озған жаңа жылдың 1 қаң­тарынан бастап бюджет қызмет­керлері, зейнеткерлер және сту­денттердің айлығы, зейнетақысы мен шәкіртақылары көбейіп жатыр. Біле-білген адамға бұл үлкен қамқорлық. Мемлекет басшысының тікелей тапсырмасымен іске асып жатқан аталған бастама халықтың таршылық көрмеуіне көп көмек екені айтпаса да түсінікті жағдай. Әлемдік нарықта мұнай бағасы арзандап, елімізде доллар еркін айналымға жіберілген дәл осы кезеңде жалақымызға 30 пайыз үстеме қосылғаны шын қуантты. Елбасының көреген көшбас­шылығының арқасында бұл дағдарыстан да аман шығарымыз анық. Себебі, Мемлекет басшысы осыдан алты жыл бұ­рын құр шикізатқа иек артып отыратын за­ман­ның өткенін айтып, елімізде индус­трия­лық-инно­вация­лық­ жо- баларды да­мы­ту­­ға тап­­сырма берді. Со­­ның ар­қасында Қазақстанда көпте­ген зауыттар мен фабрикалар, өн­діріс орындары ашылды. Индус­триялық-инновациялық бағдар­ламаның шапағатын Қызылорда облысының Жалағаш ауданы да көріп отыр. Аталған бағдар­ламаның шеңберінде біздің ауданда мия тамырын өңдейтін зауыт салынды. Аудан экономикасына өзіндік септігін тигізіп отырған зауыттың орны бөлек. Дағдарыс заманында халқының айлығына үстемақы қосып, жаңа жұмыс орындарын ашып отырған еліміздің даму бағытына қарап қандай қиыншылықты да еңсере алатынымызға сенеміз. Жағыпар ТӘЖМАХАНОВ, Жалағаш ауданы әкімінің орынбасары. Қызылорда облысы.