Қиындыққа қалдырмайды

Өскемендік кәсіпкер, «Ләззат» тігін цехының жетекшісі Айгүл Тұңғатарова – сал ауруымен жеті жыл төсек тартып жатса да, өз өмірін өзі қолына алып, аяқтан нық тұрған, жеке кәсібін құрған ерік-жігері ерекше жан. Екінші топтағы мүгедек әйел әлеуметтік жәрдемақы көлемінің артуы кембағал жандардың тұрмысына сеп болатындығын айтады. – Адамды алға жетелейтін – еңбек пен ерік-жігер. Елбасымыз осы қасиеттерді әрқашан елімізге үлгі етіп келеді. Біз, өмірде қаншама қиындық көрсек те, еңбектің арқасында көздеген мақсатымызға жеттік. Айталық, бүгінде ательемізде мүгедектіктің әртүрлі тобына жататын 14 адам еңбек етеді. Ал жалпы облыс көлемінде 18 адамды жұмыспен қамтып отырмыз. Кәсіп­орнымызда жүзден астам төсек-орын жабдықтары мен арнайы киім түрлерін шығарамыз. Президент жуырдағы Жол­дауында жаңа әлеуметтік саясат жүзеге асырылатынын мәлімдеді. Яғни, мемлекет әлсіз қорғалған азаматтарды қолдайды. Мұқтаж адамдарға атаулы әлеуметтік көмек көрсетеді. Бірақ бұл мемлекетке біржола масыл болу дегенді білдірмесе керек. Осы орайда Мемлекет басшысы «Басқалар табысты өз еңбектерімен табуы тиіс», деп атап көрсетті. Әлбетте, Қазақ­стан­да әлеуметтік жа­ғы­­нан аз қамтылған адамдарға мем­лекет тарапынан көп көңіл бөлінеді. Мысалы, мен әлеуметтік жәрдемақы аламын. Биыл бұл көмек 1 қаңтардан бас­тап 30 пайызға артатыны ерекше қуантады. Сондай-ақ, біз жылына бір мәрте мемлекеттің қолдауымен емдік-сауықтыру шипажайына жолдама аламыз. 2015 жылдың 11 желтоқсанында кіл мықты кәсіпкерлер қатысқан «Алтын сапа» байқауының «Іскер» аталымы бо­йынша жеңімпаз болып танылдық. Президент Нұрсұлтан Әбішұлының алдында өз өнімдерімізді көрсетуге мүмкіндік алдық. Мұның барлығы ең алдымен Елбасының, тәуелсіз мемлекетіміздің қолдауы мен қазіргідей қаржылық қыспақ күшей­ген заманда өз азаматтарын қиын­дыққа қалдырмайтынының көрінісі деп білемін. Жазып алған Думан АНАШ, «Егемен Қазақстан». ӨСКЕМЕН.