Атырауда өңір этностары туралы кітап жарыққа шықты

АТЫРАУ. 19 қаңтар. Атырауда осы өңірді мекен еткен этностар туралы кітаптың таныстырылымы өтті. Бұл туралы egemen.kz тілшісі хабарлады. Қазір Атырау облысында 17 этномәдени бірлестік жұмыс жасайды. Олар бір-бірімен тығыз байланыс орнатып, өздері өткізетін түрлі шараларға белсене араласады. Тіпті, «Иверия» грузин және «Татулык» татар-башқұрт этномәдени бірлестіктері жанынан құрылған би топтарында өзге этностың балалары да қабылданып, түрлі ұлттық билерді үйренуде. Өңірдегі Қазақстан халқы ассамблеясы құрамындағы этномәдени бірлестіктер өкілдері атқарып отырған жұмыстар, олардың татулығы мен достығы, үкіметтік емес және басқа да қоғамдық бірлестіктермен арадағы қарым-қатынасы жайлы деректерді «Атырау этностары» деп аталатын жаңа кітаптан табуға болады. Бұл кітап «Алтын кітап» баспасынан 1000 дана таралыммен үш тілде – қазақша, орысша және ағылшынша жарық көрді. Кітапта «Этносаралық қатынас саласындағы мемлекеттік саясаттың басымдылық міндеттері», «Этномәдени бірлестіктер» және «Атырау облысының Қазақстан халқы ассамблеясы» деген үш тарау бар. Жолдасбек Шөпеғұл. Дерек:  egemen.kz. Сурет: Рахым Қойлыбаев.