Мал өсіріп, ет өндіру өркендейді

Елімізде мал шаруашылығын дамытуға үлкен мүмкіндіктер туып отыр. Бұйыртса, бұдан былай етті ірі қараны бор­дақылау мен оның етін өңдеп, экспортқа шығару ісі өркендей түспек. Кеше Орталық коммуникациялар қызметінде баспасөз мәслихатын өткізген Ауыл шаруашылығы министрлігінің департамент директоры Еркебұлан Ахметов осы жөнінде айтты. Қазақстан нарығына италия­лық Cremonini тобының құры­лымына кіретін Inalca Eurasia ірі агроөнеркәсіптік трансұлттық корпорация келе жатқанын айт­қан департамент директоры Мемлекет басшысының салаға қатысты жүктеген тапсырмалары туралы әңгімеледі. «Ел Пре­зиденті жүктеген міндетті орындау мақсатында министрлік облыс әкімдіктерімен бірлесе отырып, 2011 жылдан бастап ірі қара мал етінің экспорттық әлеуетін арттыруға қатысты жобаны жүзе­ге асырып келеді. Жобаның шең­берінде мал бордақылау алаң­дарын салу жұмыстары жүргізілді. Қазіргі таңда олардың жалпы қуаттылығы 176 мың бас малды бордақылауға қауқарлы. Төрт жылдан бері тұрақты түрде тұқымдық түрлендіру, яғни жергілікті мал басының тұқымын жақсарту мақсатында асылдандыру және селекциялық жұмыс­тар жүргізіліп отыр. Осы кезде фер­мерлік шаруашылықтарда тұқымдық түрлендіруге арналған 660 мыңнан астам ұрғашы мал бар. Осынау бағдарламаға мал шаруашылығындағы 10 мыңнан астам шаруашылық қатысып жатыр. Бұл көрсеткіш барлық ұрғашы мал басының 25 пайызын құрайды. Жеңілдетілген «Сыбаға» бағдарламасы аясында 270 мыңнан астам ұрғашы мал сатып әкелінді. Өз кезегінде бұл жоба ірі қара мал шаруашылығында фермерлік қожалықтарды дамытуға үлкен жол ашты», деді Е.Ахметов. Енді еліміздің нарығына келе жатқан италиялық Cremonini то­­­бының құрылымына кіретін Inalca Eurasia ірі агроөнеркәсіптік трансұлттық корпорациясы туралы айтар болсақ, ол қазақстандық «Актеп» компаниясымен бірге «100 нақты қадам» Ұлт Жоспары шең­беріндегі «етті өндіру және қайта өңдеуді дамытуға ст­ра­тегия­лық инвесторларды тарту» 61-қадамын жүзеге асыру мақ­сатында меморандумға қол қойыпты. Брифингке қатысқан корпорация өкілі Андрей Вакулиннің сөзіне қарағанда, Қазақстан мал өсіру мен оның етін экспорттауға әлемдегі ең қолайлы елдің бірі екен. Оның бірінші дәлелі, қазақ билігі осы іске өте мүдделі болып, оны жүзеге асыруға құлшыныс танытып отыр. Екінші, қазақтың кең-байтақ жері мал өсіруге жайлы әрі тиімді көрінеді. «Inalca Eurasia» еліміздің ет саласына 100 млн. еуродан ас­там инвестиция салуға шешім қа­былдады, осы инвестициялар республикамыздың үш облысында жалпы қуаттылығы 44 мың бас малды бір уақытта бордақылап бағу алаңдарының құрылысы үшін сатылап-бірік­тірілген компанияны құруға бағытталатын болады. Оған қоса, Ақтөбе облысындағы ет комбинатының қуаттылығын арттырып, 20 мың тонна ет және ет өнімдерін өңдей алатындай етіп жаңғырту жоспарланған. «Inalca Eurasia» компаниясы қазақстандық ет брен­дін қалыптастыруға және Ресей мен Еуропа елдерін ет экс­­­портымен қамтамасыз етуге ниетті. Ал «Актеп» компаниясы 2015 жылы ай сайын тұрақты түр­де 200 тонна көлемінде ет экспорттауға шығып отыр. 2016 жылы ет өнімдерін экспорттауды жылына 12 000 тоннаға дейін жеткізуді жоспарлаған көрінеді. Қуаттылығы жылына 7200 тонна ет өндіретін заманауи ет өң­дейтін зауыт салынған. Осының барлығы компанияның етті мал шаруашылығындағы өңіраралық кооперацияның орталығы бо­луға мүмкіндік береді екен. Бұлармен бірге, үш облыстың әкімдіктері мен министрлік және «Inalca Eurasia» компания­сы ара­лығында, өңірлердегі ет экс­пор­тының әлеуетін арттыруға мін­деттер мен индикативті көр­сет­кіштерді анықтайтын етті мал шаруашылығы саласында өңір­аралық кооперация құру бойынша бірлескен іс-әрекеттер жоспарына қол қойылыпты. Былтыр қараша айында «Евр­азия агрохолдинг» және «Rifa Holding Group» қытайлық транс­ұлттық компаниялар арасында Шығыс Қазақстан облысының Аягөз ауданында қуаттылығы 17 мың тонна ет өнімін құрайтын ет комбинатының құрылысы бо­йынша бірлескен инвестициялық жобаны жүзеге асыру бойынша да меморандумға отырыпты. Өнім Қытайға экспортталады. Бүгінде АШМ-нің ветеринарлық бақылау қызметі ҚХР-дың ветеринарлық қызметімен бірге Қазақстаннан Қытайға мал шаруашылығы өнім­дерін өткізуге қойылған тыйымдар мен шектеулерді алып тастау, сондай-ақ, сиыр және қой еті бойынша қытай нарығына рұқсат алу мәселелерін пысықтауда екен. Департамент директоры осы жөнінде айта отырып, Қытай Шы­ғыс Қазақстан облысында ет кластерін құруға 11 млн. доллар инвестиция салатынын жеткізді. «Бұл жобаға Қытай 11 млн. доллар инвестиция салмақ. Осы ет кластерінде қуаттылығы 17 мың тонна болатын ет өңдеу кешенін салу жоспарланды», деді ол. Нұрбай ЕЛМҰРАТОВ, «Егемен Қазақстан».