Парламентке іскер, патриот азаматтар келуі керек

Алдымен, осындай қадамға баруға қандай қажеттілік болды деген сауалға жауап іздеп көрейік. Бұл ретте ең бірінші ойға әлемнің қазіргі геосаяси жағдайы оралады. Өйткені, экономикалық дағдарыс күн өткен сайын күрделеніп барады. Ол аздай, сарапшы мамандар алдағы уақытта мұнайдың бір баррелінің бағасы 30 доллардан да төмен түсетінін айтып, дабыл қағуда. Сондай-ақ, алып мемлекеттердің арасындағы кикілжіңдер де отқа май құйып отыр. Міне, осының бәрі жаһандық экономикалық дағдарыстың жай ғана ушықпай, жаңа қарқын ала бастағанынан хабар береді. Мәжіліс және барлық деңгейдегі мәслихаттар депутаттарының сайлауын кезектен тыс өткізуді соның бір тетігі деп білемін. Сондықтан Қазақстан Республикасының азаматы, елімнің патриоты және үкіметтік емес ұйымның өкілі ретінде Мәжіліс депутаттарының бұл бастамасын толық қолдаймын. Сайлаудың тағы бір артықшылығы, осы кезде халық өз таңдауын жасауға мүмкіндік алады. Бұл – Мәжіліс және мәслихат депутаттары халықтың сеніміне қол жеткізеді деген сөз. Ал елдің сенімі адамға жігер беріп, рухын күшейтеді. Өз кезегінде бұл қасиеттер алдымызда тұрған «100 нақты қадам» Ұлт Жоспарын, бес институттық реформаны және дамыған 30 елдің қатарына қосылу стратегиясын жүзеге асыруда септігін тигізеді. Осы ретте, сайлаудан кейін Парламенттің құрамы қаншалықты жаңарады деген заңды сұрақ туындайды. Біріншіден, іскер азаматтар келуі тиіс. Екіншіден, елі үшін отқа түсуден тайынбайтын патриоттар керек. Үшіншіден, елдің мұңын мұңдап, жоғын жоқтайтын шын жанашыр азаматтар келеді деп үміттенемін. Міне, сонда ғана біз кез келген экономикалық қиындықтарға төтеп беретін боламыз. Мұндай пікірді, мұндай ойды тек мен емес, барша халық айтып отыр. Олардың арасында кезектен тыс Мәжіліс пен барлық деңгейдегі мәслихаттар сайлауларын өткізуді қолдайтын студенттер де бар. Зиябек ҚАБЫЛДИНОВ, Л.Н. Гумилев атындағы Еуразия ұлттық университетінің профессоры, «Еуразия» гуманитарлық ғылыми-зерттеулер орталығының директоры.