Барнаулда өткен фестивальде студенттер қазақ күйлерін орындады

ПАВЛОДАР. 20 қаңтар. Барнаулда ұйымдастырылған ХІІ халықаралық музыкалық фестиваль-конкурсында Сұлтанмахмұт Торайғыров атындағы мемлекеттік университеттің «Орындаушылық өнер» кафедрасының студенттері Жұлдыз Жұмаділова, Нұргүл Жарылғасова, Құралай Темірбекова Құрманғазының күйлерін орындады. Бұл туралы университеттің баспасөз қызметіне сілтеме жасаған egemen.kz тілшісі хабарлады. Конкурстың мақсаты жаңа жас таланттарды ашу, үздік орындаушылық дәстүрді дамыту, ән өнерін мәдени мұра ретінде сақтау және байыту. Байқауға 500 орындаушы-музыкант қатысты. Аталған фестивальде Жұлдыз Жұмаділова «Сирек музыкалық аспаптар» номинациясы бойынша І дәрежелі лауреат дипломымен марапатталды. Айта кетейік, студент күйшілердің Барнаулға баруына университет ректоры Арын Өрсариев,«Орындаушылық өнер» кафедрасының меңгерушісі Данияр Мерғалиевке қолдау көрсетті. Күйлерді үйреткен кафедраның аға оқытушысы Ырысгүл Сабекова. Фарида Бықай. Дерек, сурет: egemen.kz.