Жыры әлемді шарлаған

Қазақстан Жазушылар одағы жыр алыбының 170 жылдық мерейтойының қарсаңында «Жамбыл айлығын» жариялады Үстіміздегі жылдың ақпан айының 28-інде Қазақстан халқы жыр алыбы Жамбылдың 170 жылдығын тойлайды. Осыған орай Қазақстан Жазушылар одағында «Жамбыл айлығы» басталып, журналистерге арналған алғашқы бас­пасөз мәслихаты өтті. Жиналысты жүргізген жазушы, жамбылтанушы ғалым Нағашыбек Қапалбеков айлық кезінде республикамыздың түкпір-түкпірінде ұйымдастырылатын игі шаралардың – ұлы ақынның мұрасын зерттеу, зерделеу бағытындағы түрлі кештер мен ғылыми конференциялардың, симпозиумдар мен ән-жыр кештерінің бағдарламасы туралы айтып берді. Ал өз сөзін: – Жамбыл менің өз атым, Халық – менің шын атым, – деген ұлы ақынның жырымен бастаған Қазақстан Жазушылар одағы басқармасының төрағасы, сенатор Нұрлан Оразалин мерейтойдың Қазақстан Жазушылар одағында «Жыры әлемді шарлаған» атты сазды-кештен басталуының жайдан-жай еместігіне тоқталды. «Өйткені, ақындық өнерімен әлемді жаулап алған Жамбыл есімі ешқандай да таныстыруды қажет етпейтін феномен құбылыс», деді тебірене сөйлеген ақын-сенатор Нұрлан Оразалин. Елордамыз Астанада «Жамбыл айлығының» аясында да ақпанның 18-і күні «Жыр алыбына тағзым» атты әдеби сазды кеш өтеді. Жазушылар одағының үлкен залында ақындар жырдан шашу шашты. Атақты «Сүйінбай сазы» ансамблі концерт қойды. Талғат СҮЙІНБАЙ, «Егемен Қазақстан». АЛМАТЫ.