Сенат Төрағасы Қ.Тоқаев: Президенттің сөзі – еліміз үшін жол көрсеткіш бағдар

Сенат бюросының кезекті отырысында палата Төрағасы Қасым-Жомарт Тоқаев депутаттарды «Нұр Отан» партия­сының кезектен тыс съезі барысындағы Президент Н.Назарбаевтың сөзіне жіті назар аударуға шақырды. «Пар­тия мен халық алдында тұрған міндеттер жайында салмақты әңгіме болды. Мемлекет басшысының сөзі мазмұны бойынша өте терең және Мәжіліс пен мәслихаттардың сайлау­лары қарсаңында жол көрсететін бағдар болуы тиіс», – деді Қ.Тоқаев. «Бүкіл Парламенттің заң шы­ғару міндетін орындай отырып, Сенат Президент саясатын іске асыруға жоғары жауапкершілікпен әрі біліктілікпен атсалысады және бұл жауапкершілік, ең алдымен, қабылданатын заңдардың сапасына қатысты», – деп атап өтті Сенат Төрағасы. Ал Сенат Бюросы жоғарғы па­латаның 2016 жылғы 4 ақпанда бо­ла­тын кезекті отырысының күн тәр­тібін келісті. Сенаторлар Қазақ­стан мен Германия үкіметтері арасындағы Адамдарды қабылдау және транзиттеу туралы келісімді (реадмиссия туралы келісім); Қа­зақстан мен Чехия үкіметтері ара­сындағы Заңсыз келген адам­дардың реадмиссиясы туралы келісімді; Қазақстан мен Ресей үкіметтері арасындағы «Бай­қоңыр» ғарыш айлағынан зымырандарды жіберу кезінде авариялар болған жағдайдағы өзара іс-қимыл тәртібі туралы келісімге өзгерістер енгізу туралы хаттаманы ратификациялау туралы заң жобаларын талқылайды. Бюрода, сондай-ақ, Мәжі­ліс­тің тарауына байланысты Пар­ламенттің төменгі палатасының Аппаратынан сұратып алынған 16 заң жобасы Сенаттың тұрақты комитеттеріне бөлініп берілді. Атап айтқанда, Конституциялық заң­нама, сот жүйесі және құқық қор­ғау органдары комитетіне Қазақ­стан мен Молдова арасын­дағы заңсыз болатын адамдардың реадмиссиясы туралы келісімді және заңсыз болатын адамдардың реадмиссиясы туралы келісімді іске асыру бойынша атқару хаттамасын ратификациялау туралы заң жобасын жүргізу тапсырылды. «Шанхай ынтымақтастық ұйымына мүше мемлекеттердің шекара мәселелері бойынша ынтымақтастығы мен өзара іс-қимылы туралы келісімді ратификациялау туралы» заң жобасы Халықаралық қатынастар, қорғаныс және қауіпсіздік комитетіне берілді. Экономикалық саясат, инновациялық даму және кәсіпкерлік комитеті «Қазақстан Республикасының кейбір заңнамалық актілеріне мемлекеттік қызметтер көрсету мәселелері бойынша өзгерістер мен толықтырулар енгізу туралы»; «Қазақстан Республикасының кейбір заңнамалық актілеріне тұтынушылардың құқықтарын қорғау мәселелері бойынша өзгерістер мен толықтырулар енгізу туралы»; «Қазақстан Республикасының кейбір заңнамалық актілеріне теміржол жолаушылар көлігі мәселелері бойынша өзгерістер мен толықтырулар енгізу туралы»; «Пошта туралы» және заңнамаға пошта мәселелері бойынша түзетулер; «Лотерея және лотерея қызметі туралы» және заңнамаға лотерея және лотерея қызметі мәселелері бойынша түзетулер; Қазақстан мен Словакия Үкіметтері арасындағы Инвестицияларды көтермелеу және өзара қорғау туралы келісімді ратификациялау туралы заң жобалары бойынша бас комитет болып белгіленді. Әлеуметтік-мәдени даму және ғылым комитеті «Қазақстан Республикасының кейбір заңнамалық актілеріне баланың құқықтарын қорғау мәселелері бойынша өзгерістер мен толықтырулар енгізу туралы» заң жобасы бойынша жұмыстарға басшылық етеді. Заңнамаға ғарыш қызметі; астық нарығын реттеу; Қазақстан Респуб­ли­касының «жасыл экономикаға» көшу мәселелері бойынша түзетулерді; Каспий теңізінің теңіз ортасын қорғау жөніндегі негіздемелік конвенцияға Мұнаймен ластануға әкелетін тосын оқиғалар жағдайындағы өңірлік әзірлік, ден қою және ынтымақтастық туралы хаттаманы және Құрылықтық қайраңда орналасқан стационарлық платформалар қауіпсіздігіне қарсы бағытталған заңсыз іс-әрекеттермен күрес туралы хаттамаға 2005 жылғы хаттаманы ратификациялау туралы заң жобаларын жүргізу Аграрлық мәселелер, табиғатты пайдалану және ауылдық аумақтарды дамыту комитетіне берілді, деп хабарлады Сенаттың баспасөз қызметі.