Алматыда Кәкімжан Қазыбаев туралы кітап жарыққа шықты

АЛМАТЫ. 9 ақпан. Алматы қаласындағы әл-Фараби атындағы Қазақ ұлттық университетінде белгілі мемлекет және қоғам қайраткері, жазушы-журналист Кәкімжан Қазыбаевтың өмірінен сыр шертетін «Өнегелі өмір» сериясы бойынша жарық көрген кітаптың тұсаукесері болып өтті. Бұл туралы egemen.kz тілшісі хабарлады. Тағылымды ғұмыр кешкен азаматтың жүріп өткен жолы, журналистикадан бастап қоғам қайраткерлігіне дейінгі ғибратты ғұмыры осылайша кітап болып, келешекке жол тартты.  Кітап әл-Фараби атындағы Қазақ ұлтық университетінің «Өнегелі өмір» сериясы жобасы аясында жарық көріп отыр. Кәкімжан Қазыбаевтың шығармашылығына арналған басқосу студенттер үшін шеберлік дәрістері сынды қызықты өтті. Ал тұсаукесер рәсімін университет ректоры Ғалымқайыр Мұтанов ашып, Қазыбаевтың көзін көрген тұстастарына, әріптестеріне сөз берді. Мемлекет және қоғам қайратерлері Бижамал Рамазанова, Шәмшә Беркімбаева, Сарбас Ақтаев, Софы Сматаев, Әбіләкім Әубәкіров сынды танымал адамдардың естеліктері есте қаларлықтай әсерлі өрбіді. Тұсаукесер соңында Кәкімжан Қазыбаевтың аяулы жары, Қазақстан Республикасының еңбек сіңірген қайраткері Орынша Қарабалина сөз алып, отбасы атынан Кәкімжан ағамыз түлеп ұшқан білім қарашаңырағына алғыс айтып, жастар айта жүрерліктей тебіреністі естеліктерімен бөлісті. Айнаш Есали. Дерек, сурет: egemen.kz.