Финляндия да алыс емес

Қазір маңдайды шыт орамалмен шарт байлап, шапанның бір етегін белбеуге қыстырып, көлдей орамалмен маңдайдың терін бір сүртіп, ай жүзді кетпенмен жер аудару өткен шақ болып қалды. Тыңайтқыш дегенде қой, сиырдың қыс бойғы жиналған көңін айдалған жерге төгіп, тыңайтқыш бердім деп малданудың да күні келмеске кетіп барады. Жаңа технологиясы қарыш­тап дамыған Америка, Еуро­па және Қытай шаруалары жерінен бір уыс топырақ алып топырақ зерттеу институ­тына тапсырады. Зерттеудің нәтижесі бойынша жерің жыл сайын салатын көңге зәру емес, ағзасы басқа тыңайтқыштарды қалайды екен. Осылайша, баяғыдай демалдыруға бос танап қалдырмай жыл сайын мол өнімнің астында қаласыз. Мол өнім – мол табыс. Оң­түстікте тамшылатып суару мен минералды тыңайтқыштарды пайдалану бойынша ауыл­ша­руашылық семинары өткенде жоғарыдағы жайттар тағы да байқалып қалды. Облыстық Кәсіпкерлік мектебі мен «Кос­АгроКоммерц» компаниясы бірлесіп өткізген семинарда диқандарға жабық топырақта қызанақ, қияр және алма түп­терін тамшылатып суаруда суда тез еритін Calcinit пен Kristalon тыңайтқыштарының жаңа түрлері таныстырылды. Се­минарға арнайы шақырылған финляндиялық «Yara» компаниясының өкілі Улла Сундел IOS және Android платформаларынан табуға болатын «Yara CheckIT» мобильді қосымшасын да таныстырды. Бағдарламаның ішінде өсімдіктің ауруға шалдығуының себебін анықтап, оның алдын алатын емдеу амалдары туралы нұсқаулықтар орналасқан. Бұл жобаға дүниежүзінің елу мемлекетінің агрономдары жоғары баға бергендігі айтылды. Енді ауыл шаруашылығындағы әлемдік жаңа технологияның жетістігін оңтүстікқазақстандық шаруалар да көретін болады. Бұған қоса айтарымыз, Оңтүстік диқандары аз жерден көп дақыл алуға болатын италиялық технологияны еркін меңгерген. Сәл жел соқса сау етіп жерге төгілетін, шұрық тесік алмалар орнына сымға керіп ергежейлі бойлы алма көшеттерін көптеп отырғызып жатыр. Қоңыр күзде осы әлжуаз көшеттер шыбығы жерге тиердей болып жеміс салады. Үлкендігі кәрлен кеседей, дәмі жартысы бал, жартысы қант. Облыс әкімдігінің ұйытқы болуымен шетелдік үздік технология Оңтүстік жерін осылайша жерсініп жатыр. Бақтияр ТАЙЖАН, «Егемен Қазақстан». Оңтүстік Қазақстан облысы.