Бұл спорт түрінің аты – воркаут

Алғыс айту күні аясында Астанадағы «Сарыарқа» сауда, ойын-сауық орталығында «Тәуелсіз Қазақстан – сала­матты Қазақстан» Street Workout-2016 республикалық фестивалі өтті. Күн сайын жаңарып, жаңа­­лықтармен толығып, өзге­леніп, түрленіп жатқан әлемде спорттың да жаңа атау­лары, жаңа түрлері шығып, ол жұмыр Жерге таралып жатқаны таңсық болмай қалды. Ақпараттың жедел алмасуы арқасында жер шарын шарлап кеткен осындай қарапайым әрі жасқа қарамайтын, бала-шаға да, қарттар мен жастар да айналысатын спорт-воркаут (WORKOUT) аталады. Бұл – ең қол­жетімді, көп қаржыны қажет етпей­тін, аулалардағы қарапа­йым спорт құралдарының кө­мегімен негізінен өз дене сал­мағын дұ­рыс қа­лыпқа кел­тіремін деген адамдардың айналысатын спорттың түрі. Бір сөзбен айтқанда, көше гимнастикасы. Алғашында, 2000-жыл­дардың басында интернет желісінде спорт­шы емес, қарапайым жас­тардың қолжетімді спорт құ­ралдарымен түрлі қиын жаттығулар жасаған бейнетаспаларын желіге сал­уы көрген адамдарды қы­зықтырып, воркауттың өрістеуіне жол ашыпты. 2009 жылға дейін воркаут спорты туралы Қазақстанда ақпарат болмады. Бүгінгі таңда онымен шұғылданатындардың саны Астана, Алматы, Та­раз, Шым­кент, Ақтау, Қарағанды, Көкшетау сияқты ірі қалаларда 75 мыңнан асса, Астананың өзінде 5 мыңға жетіпті. Қазақстаннан тыс жерлерде стрит воркаут спортымен 2 000 000 адам айналысады екен. Бірте-бірте өркендеп, өзіне елі­ге­тіндер қатары артқан сайын воркауттан халықаралық фестивальдер, жарыстар өткізіліп, ол біздің еліміздің жастарын да баурап, қазір онымен шұғыл­данатындар саны ұлғая түсуде. Осы бір жас талғамайтын, адамды саламатты өмір салтына бейім­дейтін спортқа Қазақстан халқы Ассамблеясы назар аударып, «Street Workout and Street Lifting Қазақстан федерациясы» РҚБ, Қазақстан Президентінің жанындағы «Қоғамдық келісім» рес­публикалық мемлекеттік мекемесі фестиваль өт­кізуді ұй­ғарған. «Сарыарқа» сауда, ойын-сауық орталығы фестиваль­ға қатысушылар мен оны қы­­­­­зықтаушыларға толы. Ұйым­дастырушылар айтқандай, фестивальдің мақсаты – жастар арасында саламатты өмір салтын ұстануды дәріптеу және бұқаралық, қолжетімді спорт түрлерімен айналысуға шақыру арқылы есірткіге, шылым шегуге, ішімдікке құмарлық және интернетке тәуелділікке қарсы күрес жүргізу десек, шараға жи­нал­ғандар қарасының көптігінің өзі мақсаттың орындалатынын, болашақта өрістейтін спорттың жаңа түрі өмірге келгенін көр­сеткендей. Фестивальға ««Здоро­вый Образ Жизни» халық­аралық қозғалысының көшбасшысы, «Street Wor­kout» Бүкіл­украиндық қо­ғамдық ұйымы­ның пре­­зиденті, халықаралық «Street Workout» ұйымы­ның жетекшісі Денис Минин (Украина), «Street Workout» қозғалысының көшбасшысы Адам Рав (Чехия), халық­аралық дәрежедегі судья, «Street Workout» бойынша бірнеше дүркін чемпион Константин Албуков (Ресей), «Street Workout» бойынша әлемнің қазіргі чемпионы, Қазақстанның абсолюттік чемпионы Дияс Биджиев (Қазақстан), «Bar Bars Pro» командасының мүшелері, мемлекеттік органдар өкіл­дері, еліміздің жетекші спорт­­шылары, оқушы жас­тар, қала тұрғындары тартылыпты. Шараға қатысушы жас­тар арасында фристайлдан, қосымша жүк артып тартылу тәрізді спорт түр­лерінен жарыс өткізіліп, шетелден келген меймандар өздерінің өнерлерін ортаға салды. Фестиваль аясында, сондай-ақ, «Чемпион бол!» қайырымдылық акциясы өтіп, акция барысында 6 жасар аққан ауруына шал­дыққан Әділ Сар­баевтың емделуіне қажетті қаражат жиналып, шараның жеңім­паздары анықталып, марапаттау рәсімі өткізілді. Қатысу­шыны да, жанкүйерді де қамтып өткен шараның қызықты тұсы – «Мен ал­ғыс айтамын!» атты жас­тар флеш-мобының өтуі болды. Соңынан шараға белсенді қатысушыларға және балалар үйлерінің тәр­биеленушілеріне естелік сыйлықтар берілді. Жақсы істің жағымды жалғасы – биылғы 1 нау­рыздан бастап, еліміздің қалалары мен облыстарында ҚХА «Қайырымдылық керуені» акциясы аясында «Street workout» көше спортымен айналысуға арналған спорт алаңдарын салу жобасы іске қосылды. Анар ТӨЛЕУХАНҚЫЗЫ, «Егемен Қазақстан». Суретті түсірген