16 Наурыз, 2016

Әзірлік барысымен таныстырды

315 рет
көрсетілді
3 мин
оқу үшін
Орталық сайлауОрталық сайлау комиссиясының баспасөз орталығында Астана қаласы аумақтық сайлау комиссиясының өкілдері журналистерге сайлауға дайындық барысы туралы брифинг өткізді. Астана қалалық аумақтық сайлау комис­сия­сының төрағасы Игі­лік Жал­быровтың айтуынша, Ас­тана қаласы бойынша мәслихат депутаттығына бар­лығы 121 кандидат тіркелген. Олардың 33-ін саяси партиялар, 6-ын қоғамдық бірлестіктер ұсынған, ал 82 кандидат өзін өзі ұсынған. «Қалалық сайлау комиссиясы партиялық тізімдерін ұсынған саяси партиялардың және мәслихат депутаттығына кан­ди­даттардың үгіт жұмысын жүр­гізуге құқығын қамтамасыз ету жө­нін­де шаралар қолдануда, – деді И.Жал­быров. – Қалалық сайлау комис­с­иясымен келісім бойынша қала әкімінің шешімі­мен саяси партиялардың үгіт баспа материалдарын орналастыру үшін 31 орын және мәслихат депутаттығына кандидаттардың үгіттік баспа материалдары үшін 54 орын айқындалып жаб­дықталды. Сондай-ақ, саяси партиялар мен кандидаттардың сайлаушылармен кездесулерін өткізу үшін шарттық негізде ұсынылатын 13 үй-жайдың тізімі бекітілді». Аумақтық сайлау комис­сия­сының басшысы атап өт­кен­дей, сайлау комиссиялары үгіт материалдарының заң­на­маға сәйкес орналастырылуын бақылауды жүзеге асырады. Сайлау алдындағы үгітті жүр­гізуде сенім білдірілген адамдар ерек­ше рөлге ие. Саяси пар­тия­­лар мен мәслихаттар депу­тат­ты­ғына кандидаттар се­нім біл­ді­ріл­ген адамдарды өз қа­лауы бойынша тиісті округте бір сайлау учаскесіне 3 адамнан асырмай анықтайды. Ал Ас­­та­на қаласы аумақтық сайлау ко­мис­сиясының хатшысы В.Пытьева: «Астана қаласының аумақтық сайлау комиссиясы бес саяси партияның – «Нұр Отан» партиясының, ҚКХП-ның, «Ақ жол» ҚДП-ның, «Бірлік» СП-ның және «Ауыл» ХДПП-ның, барлығы 731 сенім білдірілген адамын, ал округтік сайлау ко­мис­сиялары мәслихаттар депу­татты­ғына кандидаттардың 836 сенім білдірілген өкілін тіркеді», – деді. Брифингте сайлау алдындағы үгіт үшін қаржыландырудың екі түрі қарастырылғаны да атап өтіл­ді. «Республикалық бюд­жет­тен Ас­тана қаласы мәсли­хатының депу­таттығына әр кан­дидатқа теле­дидарда және радиода сайлауал­ды бағдар­ламасымен шығу­ға, баспа басылымдарында 2 ма­қала жариялауға, сондай-ақ, үгіт­тік баспа материалдарын басып шығаруға, сайлаушылар­мен кез­десулер үшін үй-жайларды жал­ға алуға, көліктік шығыстарға тең мөлшерде 245 мың теңге көле­­мін­де қаражат бөлінеді, – деді осы жөнінде И.Жалбыров. – Со­ны­мен қатар, саяси партиялар мен мәслихат депутаттығына канди­дат­тардың арнайы сайлау қор­ларын құруға құқығы бар. Сайлау қорлары қаражатының шегі сайлау туралы заңмен анықталған». Аумақтық сайлау комиссия­сы өкіл­дерінің хабардар етуін­ше, мәслихат депутат­тығына кан­­­ди­дат сайлау қоры­ның қара­жа­тына жеке өзі иелік етеді. Бұл рет­те округ­тік сайлау комиссиялары банктер­мен бірлесіп сайлау қорлары қаражатының жұмсалуын ба­қы­лауды жүзеге асырады және екі аптада бір рет сайлау қорларына қаражаттың түсуі және жұмсалуы туралы хабарды БАҚ-та жариялайды. Әлисұлтан ҚҰЛАНБАЙ, «Егемен Қазақстан».