Түскен өтініштер де аз емес

Кеше Орталық сайлау комиссиясы төрағасының орынбасары Владимир Фоос бұқаралық ақпарат құралдарының өкілдеріне кандидаттардың, саяси партиялардың және азаматтардың өтініштерін қарау барысы туралы брифинг өткізді. ОСК төрағасының орынбасары атап өткендей, «Қазақстан Республикасындағы сайлау туралы» Конституциялық заң­ның 49-бабына сәйкес сайлау ко­ми­ссиясының және оның мүше­лерінің шешімдеріне және іс-әре­кеттеріне (әрекетсіздігіне) ша­ғымдарды жоғары тұрған комис­сия шағым түскен күннен бас­тап, егер «Сайлау туралы» Заң­да өзгеше көзделмесе, үш күн ішінде қарайды. Ал азаматтар мен ұйымдардың сайлау заң­на­масының бұзылғаны туралы өтініштерін сайлау комиссиялары шағым түскен күннен бастап, егер «Сайлау туралы» Заңда өзге­ше көзделмеген болса, бес күн ішінде қарайды. «2016 жылғы 20 қаңтар – 14 нау­рыз аралығындағы кезеңде Орт­сай­лаукомға жеке және заңды тұлға­лардың 113 өтініші келіп түсті, – деді В.Фоос осы мәселеге қа­тысты. – Түскен өтініштердің 29-ы (25,7%) Қазақстан Рес­публикасы Парламенті Мәжі­лісінің депутаттарын сайлау жө­нін­дегі сайлау науқанымен байланысты. Олардың ішінде 9-ы – қо­ғамдық бірлестіктерден, 11-і – жеке тұлғалардан, 8-і – БАҚ-тар­дан, 1-еуі – облыстық сайлау ко­миссиясынан». В.Фоостың хабардар етуінше, 10 өтініш сайлау заңнамасының жекелеген нормаларын түсіндіруге қатысты, 5 өтініш Пар­ламент депутаттығына дауысқа түсуге ниет білдіруге және белгілі бір кандидатты қол­дау немесе партиялық тізімдерге ен­гізу туралы, 1 өтініш Қазақстан халқы Ассамб­леясынан депутаттыққа кандидаттың тір­кеуін қайтарып алу талабы жөнінде, 6-сы сайлау комиссиялары мен депутаттыққа кандидаттар туралы ақпарат беру жайында, тағы 1-еуі сайлау науқаны кезеңіндегі заң бұзушылықтар туралы ақпарат беруге, 3-еуі сайлау үдерісіне байланысты емес, яғни түрлі әлеуметтік және тұрмыстық мәселелерді шешуге қатысты. «Өтініш иелеріне жауаптар берілді. Жеті өтініш қарау үшін тиісті органдарға жолданды, – деді төрағаның орынбасары әрі қарай. – Келіп түскен 84 (74,3 %) өтініш Қазақстан Республикасы мәслихаттарының депутаттарын сайлау жөніндегі сайлау науқанымен байланысты. Олардың ішінде 58 өтініш жеке тұлғалардан, 8 өтініш БАҚ-тардан, 1 өт­ініш облыстық мәслихаттан, 8-і қоғамдық бір­лестіктерден, оның ішінде сая­си партиялар­дан, 9 өтініш аумақтық сайлау комиссияларынан». В.Фоостың айтуынша, қалған өтініштер сайлау заңнамасына байланысты. Мысалы, 27 өтініш сайлау заңнамасының жекелеген нормаларын түсіндіруге, 10-ы сайлау комиссиялары, кандидаттар және т.б. туралы ақпарат беруге, 4-еуі сайлау­ды әзірлеу мен өткізу мәселелері жөнін­де ұсыныстарға, 1-еуі мүмкіндігі шектеулі жандарға тең қолжетімділік беруге, 2-еуі әлеуметтік, тұрмыстық және басқа проблемаларға байланысты сайлауға қатысу мүмкіндігінің жоқтығына, 1-еуі депутаттыққа кандидаттың сай­лауалды үгітті жүргізу тәртібін бұзғанына, 9-ы сайлау комиссияларының шешім­деріне және іс-әрекеттеріне, 2-еуі мемлекеттік органдардың, сондай-ақ, олардың лауазымды адамдарының іс-әрекеттеріне, ал 11-і депутаттыққа кандидатты тіркеумен келіспеуге байланысты. «Депутаттыққа кандидаттардың және олардың жұбайларының табысы туралы декларациядағы мәліметтердің дұрыс еместігі және мәслихат депутаттығына сайлану құқығын қалпына келтіру туралы 16 өтініш қарау үшін тиісті органдарға жолданды және бақылауға алынды» – деді В.Фоос. * * * Кеше Орталық сайлау комиссиясының бас­па­сөз орталығында ТМД-дан байқау­шылар штабы бас­шысының орынбасары Олег Кулеба да брифинг өткізді. «14 наурызда шетел байқаушыларын аккредиттеу мерзімі аяқталды. Қазақстан Парламенті Мәжілісінің және жергілікті мәслихаттардың депутаттарын сайлау нау­қанын қадағалауға келген ТМД байқау­шылары миссиясының құрамына 301 адам кіріп отыр. Олардың ішінде Әзербайжан, Армения, Беларусь, Молдова, Ресей, Тәжікстан, Түрікменстан және Өзбекстан елдерінің өкілдері бар. Сонымен қатар, ТМД-ға қатысушы мемлекеттердің Пар­ла­ментаралық Ассамблеясынан, ҰҚШҰ Пар­ла­мент­аралық Ассамблеясынан, Ресей және Беларусь ода­ғы­н­ың Парламентаралық Ассамблеясы және ТМД-нің Атқарушы комитетінен келді», – деді О.Кулеба. *** Кеше, сондай-ақ, Орталық сайлау комиссиясы «Қазақстан Республикасындағы сайлау туралы» Қазақстан Республикасының 1995 жылғы 28 қыркүйектегі Консти­туция­лық заңының 46-бабына сәйкес Қазақстан Республикасы облыстық мәслихаты депу­татының омырауға тағатын белгісінің үлгісін, Қазақстан Республикасы қала­лық мәслихаты депутатының омырауға таға­тын белгісінің үлгісін және Қазақстан Рес­­публикасы аудандық мәслихаты депу­татының омырауға тағатын белгісінің үл­гі­сін белгіледі. Әлисұлтан ҚҰЛАНБАЙ, «Егемен Қазақстан». Суреттерді түсірген Ерлан ОМАРОВ.