Таным тағылымы

Белгілі дінтанушы, Бұха­радағы Мирараб медре­сесі мен Ташкент Ислам институтының түлегі, Оң­түстік Қазақстан облыс­ы Бәйдібек ауданы орта­лығындағы кезінде медресе болған, қазір тарихи мұражайға айналған тарихи кешенді салдырған Аппақ ишанның немересі Құрбанәлі Ахмедтің «Та­риқатнама» атты діни-танымдық кі­табы жақында «Достар Ме­диа» баспасынан жарық көрді. Кітап Президентіміз Н.Назарбаевтың «Қазақстан аумағында ислам – хана­фиттік» деп аталатын ді­ни-құқықтық мектеп пен сопылықты насихаттайтын идеологияның негізінде қалыптасты деген сөзін негізге ала отыра жазылған. Соған орай, «Тариқатнама» кітабы таяуда Президентіміз Н.Назарбаевқа ұсынылған болатын. Президент Кеңсесінен Елбасының кітапты оқып шыққандығы және авторға дінімізге сіңірген еңбегі үшін алғыс айтқандығы туралы жауап келді. «Тариқатнама» кітабы тұтастай дәстүрлі дініміздің ішкі иірімдерін ашуға негізделген. Сондықтан, еліміздегі дін мамандары мен қалың көпшілік діни танымын осы кітапта айтылған ойлармен толықтыра өрістетсе нұр үстіне нұр болатыны күмәнсіз. «Егемен-ақпарат».