Қызылордада іздеуде жүрген 7 қылмыскер ұсталды

ҚЫЗЫЛОРДА. 17 наурыз. Аймақтағы криминогендік ахуалды сейілту, құқық тәртібі мен жол қозғалысы  қауіпсіздігін қамтамасыз ету, көшелер мен басқа да қоғамдық орындарда қылмыстарды ескерту және жолын кесу бағытында облыс көлемінде «Құқық тәртібі» жедел-профилактикалық іс-шарасы өтіп жатыр. Осы шара барысында іздеуде жүрген жеті қылмыскер ұсталды. Бұл туралы облыстық ішкі істер департаментіне сілтеме жасаған .egemen.kz тілшісі хабарлады. Іс-шараның 1 күнінде әр түрлі құқық бұзушылықтар жасаған 862 азаматқа әкімшілік шара көрілді. Оның ішінде белгіленген жүру жылдамдығын арттырғаны үшін – 78, көлік құралын басқару кезінде телефонды немесе радиостанцияны пайдаланғаны үшін – 121, қауіпсіздік белдігін тақпағаны үшін – 170 азаматқа қатысты әкімшілік хаттамалар толтырылып, көлік құралын мас күйінде басқарғаны үшін 10 азамат наркологиялық сараптамадан өткізіліп, тиісті шешім қабылдау үшін жинақталған құжаттар сотқа жолданды. Тәулік ішінде 16 қылмыстың беті ашылып, оның 8-і – ізі суымай ашылды. Іздеуде жүрген 7 қылмыскер ұсталды. Есірткі затын сақтағаны үшін 30 жастағы қала тұрғынынан 44,22 грамм «кептірілген марихуана» тәркіленді. Жалпы, облыс көлемінде жол қозғалысы қауіпсіздігін қамтамасыз етуге бағытталған «Құқық тәртібі» арнайы жедел-профилактикалық іс-шарасы наурыз айының 18-не дейін жалғасатын болады. Ержан Байтілес. Дерек, сурет: egemen.kz