Әлеуметтік желіде ұшқыштарды қолдап жатыр

АСТАНА. 28 наурыз.  Әлеуметтік желіде апатты жағдайдағы ұшақты жерге қондырып, талай адамның өмірін сақтап қалған Bek Air әуе компаниясының ұшқыштарына «Халық қаһарманы» атағын беру туралы ұсыныстар айтылып жатыр. Бұл туралы egemen.kz тілшісі хабарлады. Бұл оқиға кеше таңертең болды. BekAir әуе компаниясының «Фоккер-100» типті ұшағы Қызылорда қаласынан бағыт алып, Астана әуежайына жақындағанда шассидің алдыңғы тіреу тағанынсыз апаттық жағдайда жерге қонды. Ұшақ Астанаға сағат 9.45-те қонуға тиіс болатын. Алайда өрттің шығу қаупін азайту қажет болған соң, ұшақ әуеде тағы 50 минуттей ұшып жүрді. Сөйтіп, ол сағат 10.36-да қонды. Оның бортында 116 жолаушы мен 5 экипаж мүшесі болды. Ұшақ экипажының арқасында 116 жолаушы аман қалды. Ешкім зардап шеккен жоқ. Сонымен бірге Астана әуежайы мен қаланың шұғыл қызметтерінің үйлесімді жұмысын да атап өту керек. Ұшақ жерге қонғанда қосымша 7 өрт техникасы мен 4 жедел жәрдем мәшинесі әзірленді. «Қазіргі кезде Инвестициялар және даму министрлігінің арнайы комиссиясы құрылды. Зерттеу нәтижесі кейінірек хабарланатын болады.  Bek Air әуе компаниясы ұшағының Астана әуежайында апатты жағдайда қонуының себебі анықталады», деді министр Әсет Исекешев. Дастан Кенжалин. Дерек, фото: egemen.kz