06 Сәуір, 2016

Мәңгілік ғұмыр

477 рет
көрсетілді
2 мин
оқу үшін
Мұқағали МақатаеҚазақтың қара өлеңін кие тұтқан, жүрегінің түбінен қайнап шыққан асыл жырларымен қалың жұртшылықтың махаббатына бөленген ұлтымыздың біртуар ақыны Мұқағали Мақатаевтың биыл да мерекелі жылы. Жауһар жырларымен жұр­тын сусындатқан ақиық ақынның өлмес мұрасын ұлықтау «мен қазақпын» деген әрбір жанға асыл парыз ғой. Осыған орай, Қызылорда қаласындағы химия-биология бағытындағы Назарбаев зияткерлік мектебінде «Мұқа­ғали – мәңгілік ғұмыр» атты әдеби-сазды кеш өткізілді. Кеш барысында мектептің 7-9-сынып оқушылары ақиық ақын поэзиясын жүрегімен сезініп, нақышына келтіре мәнерлеп жатқа оқыды. Сондай-ақ, қалың оқырманға белгілі, ақынның шоқтығы биік туындысы «Ақ­қулар ұйықтағанда» поэ­масын жас өрендеріміз шебер сахналап, әртістік ерекше қабілеттерін байқатты. Әдеби кеште ақынның сөзіне жазылған «Бақыт деген», «Туған жер», «Саржайлау», «Есіңе мені алғайсың» әндері шырқалып, көпшіліктің көңілінен шықты. Ақын рухымен сырласу ретінде оқушылар Г.Сәбитова «Өлеңнен сені ізде­дім», А.Сексенбаева «Мұз­ба­лақ ақын Мұқағали», А.Оңал­баев «Поэзия алыбы Мұқағали атамызға» атты өз өлеңдерін оқыды. Кеш соңында Мұқағали поэ­зиясын сүйіп оқитын мектеп мұғалімдері ақын поэзиясының дәуір талғамайтын мәңгі поэ­зия екендігін айта келіп, жас­тық шақтарын еске алып, ақын өлеңдерін жатқа оқыды. Жас маман Жасұлан Шектібаев ақын рухына өз шығармасын арнады. Тағылымы мол дүние әрқа­шан көңілге жылы ұялап, естен кетпейді. Ақын поэзиясына бас иген шәкірттеріміздің сәби жүректен шыққан үндері жыр сүйер қауымның жүрегіне жетті. Мұқағали поэзиясының құдіреттілігі де осында! Мира ДӨНЕНҚОЖАЕВА, Назарбаев зияткерлік мектебінің қазақ тілі мен әдебиеті пәндері бірлестігінің жетекшісі. ҚЫЗЫЛОРДА.